Tura, March 20, 2026:: Garo Hills Autonomous District Council (GHADC)-o NPP aro TMC apsan chaprime chalaienggipa, Garo Hills United Alliance (GHUA)-ni gital Executive Committee (EC)-ko songani ja·man, GHADC eleksin-o susana nomination file ka·ani somoio Scheduled Tribe (ST) Certificate-ko nangtelgipa ong·atani bidingo chanchirimna re·baenggipa antio Special Session-ko ong·atgen ine parakataha.

Bristibar salo, GHUA-ni skanggipa tom·aniko, Chief Executive Membor (CEM) Dhormonath Ch Sangma-ni nokdringo ong·atenba, ST Certificate-na Resolution-ko ra·na gita mikkang antio Special Session-ko ong·atna tik ka·angaha.

Indake GHUA-ni skanggipa tom·anio, GHADC-na dingtang Electoral Roll-ko tariani bidingo aro Garo Customary Law (GCL)-ko maikai ta·rake chu·sokatna man·gen, iani gimin GHUA-ni gital Executive Member-rang chanchirimaniko dakangaha.

GHADC eleksin-o susagipa candidate-rang ST Certificate dongna nanggen ine ge·etaniko on·anio gitcham, CEM Albinush R Marak-ni Executive Committee, District Council-ni kosako re·badee, an·tangni skani gita u·iataniko on·aha, ine NPP aro TMC-ni member-rang matnangatenba, uni kosako No-Confidence Motion-ko ong·atna tik ka·aha, indiba Motion-ko ra·gatna skangan gitcham CEM, kamtangko watangahani gimin, gital CEM-ko seokskaha.

Indake, gital Executive Committee, GHUA-ni skanggipa tom·aniko Bristibar salo ong·atenba, ST Certificate-ni bidingo Resolution-ko ra·na gita mikkang antio Special Session-ko ong·atgen ine u·iataha.