Tura, March 18, 2026: Garo Hills Autonomous District Council (GHADC)-ni term-ko jadokna ra·dodapataniara badiaba political dolnasan namgni ong·aigen, Garo Hills-ni manderangnade maming namgniko ra·bajawa ine Monggolbar salo, Tura-ni MDC Bernard N Marak parakatenba, ta·raken eleksin-ko ong·atchina a·dok sorkariko didiataha.

Iani bidingo a·dokni Deputy Skotong Minister aro District Council Affairs (DCA)-ni Minister Prestone Tynsong-na sedoatenba, batanggimin somoirango manderangni gisepo ding·chaogrikanirang ong·kate so·sojengjeng ong·ahani giminsa GHADC eleksin-ko ra·doataha, indiba GHADC eleksin-o Tribal ong·gijagipa manderangni susaaniko champengatna, Scheduled Tribe (ST) Certificate-ko nangtelgipa ong·atna Special Session-ko ong·atgen, ine ka·donganiko man·ahani gimin, da·o tom·tompilaha ine Marak parakataha.

“GHADC eleksin-o susana gita candidate-rang ST certificate-ko mesokna nangtelgen ine angni resolution ra·baanio pangchake manderang, iani bidingo Special Session-ko ong·atgen ine ka·dongsotokahani giminsa, da·alo so·sojengjeng ong·anirang namangpilaha. Indake ong·genchimoba, GHADC-ni term-ko da·o jadokna ra·dodapataniara Garo Hills-ni manderangnade maming namgniko ra·bajawa, indiba badiaba political dolnasan namgni ong·aigen,” ine Tura-ni MDC parakataha.

Da·o ong·enggipa GHADC-ni term April 18 tarikosa bon·engani gimin, ST Certificate-ni bidingo Resolution-ko ra·na gita da·o ong·na sienggipa, Budget Session-on man·aigen ine janapatengon, iana resolution-ko ra·na gita jadok somoiko nangjaengani gimin, GHADC-ni term-ko ra·dodapatjachina Marak, a·dokni Deputy Skotong Minister aro DCA-ni Minister-na seatgipa chittio mol·molataha.

GHADC-ni gital Chief Executive Membor (CEM)-na chakpaaniko on·gipa, BJP-ni MDC sakgnikode da·o gital Executive Committee-ba nichanggalaha, ineba Tura-ni BJP MDC matnangataha.

“BJP-ni MDC sakgnian gital CEM-ko seokanio chakpaaniko on·ahachim, indiba uamang gital EC-ni chanchirimanio BJP MDC sakgnikode okampajaha aro nichanggalaha,” ine Marak parakataha.

GHADC-ni term-ko April 18 tarikoni October 18 tarikona a·dok sorkari jadokna ra·dodapataha.