Resubelpara, March 18, 2026: Meghalaya Pradesh Youth Congress (MPYC), Resubelpara Municipal Board (RMB)-ni Chairman-na lekka sedoataha.

MPYC-ni President Timjim Momin-ni Chairman-na seatgipa chittio janapatani gitade, Resubelpara Municipal Board-ni ning·o donggipa dingtang dingtang biaprang aro Mendipathar jolo dokkan dake cha·enggipa manderangni salantio re·ruraenggipa Mendipathar bajar sambarango chimonge donenggipa jabolrangko rongtalatchina didiataha.

Resubelpara Municipal Board-ni ning·o donggipa bang·a dingtang dingtang biaprango chimonge donenggipa sogimin jabolrangko ra·ange ba salange galgija dona jasa mang ong·pilahani gimin, manderangna namen neng·nikaniko aro jajrenganiko on·enga.

Sorok rikamrang, bajar-rang aro songni dingtang dingtang biaprango jabolrangko chimonge dongengani gimin, ia jabolrang sopilaha aro sera bera ong·aha. Ia biaprango sogipa jabolrang namen namjabatengaha. Ia biaprangara
Mendipathar Salpara Bajar, Mendipathar College Road, Mendipathar Mingchengram kal·chakram samba, Mendipathar bajar jol, Dilma (Maruti Suzuki Showroom samba), Gajingpara Junction (Old DTO Office mikkang), Nangaburi Bajar (Govt. Boys ME. Skul samba) aro Resubelpara Govt. Higher Secondary Skulni kal·chakram sambarango namen namjabegipa bibarang manderangna neng·nikataniko on·enga, ine Youth Congress-ni dilgipa parakataha.

Ia biaprangara manderangni aro bading chiwalenggiparangni namen nangchongmotgipa biaprang ong·a. Indake jabolrangko chimonge donani a·sel namen soa seengenga aro manderangna neng·nikaniko on·enga. Uni gimin ia biaprangko manderangni namgnina rongtale rakkina nangenga, maina ia jabolrang soa seengani gimin manderangni an·seng baljoke donganiko nosto ka·enga, ineba Momin janapataha.

Da·ororo mikka waengani gimin, jabolrang soe, obostarang namjabatsrangaha. Ia moilarang sorokrangko sera bera, mitchi mitchi dake moila ong·atenga. Mongsongbate ia ramarangko ja·achi re·giparang aro garirang namen neng·nikaniko on·enga. Ia biaprango tampirang aro dingtang dingtang jo·ongrang bi·sarang pe·e biati, dengue, malaria aro gipin sabisirang manderango batrikrikna kenbeani ong·enga.
Rongtal an·talaniko rakkiani aro moilarangko name niroke galaniara Municipal Board-ni mongsonggipa kam ong·a, ine MPYC dilgipa parakataha.

Ia moilarangko ba jabolrangko jasa mangna galgija donanichi songsalni manderang aro dokkan dakgiparang namen jajrenganiko man·enga. Uni gimin, Resubelpara Municipal Board, ia chimonge donenggipa jabolrangko ba moilarangko ta·raken galchina MPYC dilgipa mol·molatenba, ia neng·nikanirangko mikkangchi bariatjana gita rongtal an·talaniko aro moila galanirangko name rakkichina, Momin didiataha.