Shillong, Mar 17, 2026: Garo Hills Autonomous District Council (GHADC) eleksino A·chik Scheduled Tribe (ST) candidate-rangsan susaaichina aro electoral roll-rango Tribal-rangkosan biming segatchina, GHADC-ni niamrangko bilakdapatatchina, Garo Hills-ni sak 7 Songsalna kam ka·giparang chong·motan Greneth M Sangma, Shiva Sangma, Flaming B Marak, Emanuel Ch Marak, Cherian G.Momin, Browny M Marak aro Nilbath Ch Marak, Meghalaya a·dokni Governor CH Vijaya Shankar-ko gronge, lekka sedoangaha.

A·dokni Governor-na seachi u·iatengon, GHADC eleksino Tribal ong·gijagipa manderangni bak ra·ani, electoral roll-rango biming dongaani aro Tribal-rangni a·arangko ra·sekaniara, Sixth Schedule-ni niamko pe·ani ong·a ine sak 7 songsalna kam ka·giparang parakataha.

Ia Sixth Schedule-ni niamrangko namedake ja·rikchina ge·etaniko on·na gita Governor-o bil donga. Indian Constitution-ni Article 244 (2) aro Sixth Schedule-ni niamo pangchake Garo Hills-ni Tribal-rangko chel·chakna dongimin niamrangko ja·rike, ge·etaniko on·china Garo Hills-ni sak 7 songsalna kam ka·giparang, a·dokni Governor-ko didiataha.

GHADC eleksino susana gita Garo Tribal candidate-rangnasan cholko on·china didiangenba, susaenggipa candidate-rang, Meghalaya a·doko songdongkamgipa ba atchikamgipa ong·na nanga ine Songsalna kam ka·giparang ku·pattiataha.

Unbaksana, GHADC electoral roll-rangko Special Intensive Revision (SIR)-ko dakenba, Tribal ong·gijagipa manderangni bimingrangko den·galchina aro Tribal ong·gijagipa manderangna a·a patta on·anirangko champengatchina aro a·kawe jolrango Tribal-rangni a·arangko gipin jatrangna palaniko champengatchina gitaba sak 7 songsalna kam ka·giparang a·dokni Governor-ko didiataha.