Tura, March 17, 2026: Garo Hills Autonomous District Council (GHADC) eleksino A·chik (Tribal) ong·gijagipa manderangni bak ra·aniko Garo Hills-ni dingtang dingtang dolrang, ma·gipa dolrang, Nokmarang aro A·chik a·songni manderang jegale, re·anggipa March 9 tariko so·sojengjeng ong·atahani gimin, West Garo Hills a·jao Mobile Internet-ko champengatani a·sel manderang, pilak kamrangko ka·anirango neng·nikanirangko man·tokengahani gimin, Mobile Internet-ko ta·rake watpilchina, Tura-ni MDC aro BJP-ni State Vice President Bernard N Marak, a·dok sorkariko didiataha.

Bernard Marak-ni parakatani gitade, da·ororo Garo Hills-o tom·tomani sokbapilengahani gimin, manderangna mobile internet-ko watpiltaina nanga ine didiataha.

Mobile Internet dongja baksana bijoli sirongani a·sel, West Garo Hills a·jao songdongenggipa manderang namen neng·nikanirangko chagrongna nangenga. UPI Service aro ATM-rang kam ka·jaengani a·sel, manderang an·tangtangni tangka paisarangko okna man·jae, korosrang ka·anioba namen neng·nikanirangko man·tokenga ine Marak parakataha.

Mobile Internet-ko watkujaengani a·sel poraienggipa chatro chatrirang, an·tangtangni kamrangko matchotatna man·jaenga aro pilak kamrangko ka·na gitaba, internet-ko nangani gimin, songo noko Job Card-ni kamrangko ka·anioba neng·nikanirangko chagrongtokenga ine Tura-ni MDC parakataha.

A·chik a·songni a·bri jolrango tom·tomaniko man·piltaienhoba, internet-rang dongjani a·sel a·kawe jolrango ong·enggipa obostarangko kobor ra·na gita man·jaenga ineba Marak parakataha.