By:ghdnews.in (Garo Digital News).

Tura, March 10, 2026: West Garo Hills a·jani ning·o donggipa Phulbari aro Chibinang jolrango mijal walni somoio ritchani ritcha manderang dokkanrangko wa·al so·ani a·sel so·sojengjeng ong·atanina, Pulisrangni slai goanio sakgni manderang siaha aro adita manderang saknaako man·aha ine West Garo Hills a·jani Superintendent of Pulis Abraham T. Sangma u·iataha.

WGH a·jani SP an·tangan Chibinang-o donge nirok simsakaniko dakenga aro ia jolo so·sojengjeng ong·aniko champengna chel·chakgipa dolrangko watdapatchina aganataha. Chibinang anti jolo Pulisrangko bang·a manderang vhadrapani a·sel slairangko gona nangaha.

Ia a·sel ong·aniara, Phulbari-ni gitcham MLA Estamatur SG Mominin, manigija A·chikrangni dabianiko knachakgija drae GHADC eleksino susana Sixth Schedule-ni niamko pe·e, Nomination file ka·na Tura DC-ona office-ona drae re·baani a·sel ka·onange dongenggipaandetang Mominin-ko chadrapani ja·mano, Chibinang antini dokkan aro Garo Students’ Union (GSU)-ni Office-o wa·al so·an baksa ge·sa Missionary Institute-ni a·palo donggipa Me·tra Mariam-ni Statue-ko ro·ong goe nosto ka·aha. GHADC eleksono gipin jatrangni susaaniko dingtang dingtang dolrang, Nokmarang, A·chik a·songni manderang apsan ku·monge, gipin jatrangni GHADC eleksino susana nomination file ka·aniko Tura DC office-o jinma champengsoaha.

Ia a·selrang ong·ani gisepo West Garo Hills District Administration, tom·tomanilo ra·bana, a·kawe jolrango Curfew-ko ra·gataha aro March 10 tarikni 12 bajioni March 12 tarik 12 bajiona konta 48 Internet-ko dontongataha.