Tura, March 7, 2026: GHADC election-o susaenggipa Independent candidate-rang, da·al March 7 tariko Tura Burny Hill-o donggipa Tree House-o tom·aniko ong·ate, ‘Garo Hills Independent Candidate Movement Forum’ (GHICMF)-ko bikotaha aro uamangni re·mikkangna miksonge tarigimin ming 9 Manifesto-rangko A·chik a·songni manderangna parakataha.

Independent candidate-rangni da·alo gital bimango re·mikkangna miksonganiara, batanggimin bilsirango Congress dolba GHADC-o EC-ko rikaha, da·o NPP dolba EC-ko rikaha, indiba Garo Hills Autonomous District Council (GHADC)-ko namdapatna man·jaha, batesa GHADC-na gimaaniko ra·baenga. aro A·chik jatni Niam Rongdikko gimaatna ja·ku de·enga. GHADC-ara A·chik jatni niam-reti, dakbewal rikbewalrangko ripinggipa ge·sa Institution ong·a. A·chik jatni niam-retirang, dakbewal rikbewalrangko name ripingchina gitasa, GHADC-ni ning·o dingtangmancha tribal jatrangna Sixth Schedule-ko on·aha.

Indake ong·genchimoba, GHADC-ni dilgiparang A·chik jatni nangchongmotgipa Niam Reti-rangko da·onaba tarikuja. Uni giminsa, “Chinga da·alo gimaangenggipa District Council-ko rikpiltaina, A·chik a·songni manderang baksa apsan ku·monge, A·chik jat aro a·songna kamrangko ka·na, jatni nangnikanirangko chu·sokatna re·mikangenga” ine sak 7 Independent candidate-rang parakataha.

GHICMF da·alo ming 9 miksonganirangko chong·motan, Manifesto-rangko parakataha. Ia ming 9 Manifesto-rangara skanggipa Garo Customary Law (GCL), gnigipa Separate Electoral Roll (SER), gittamgipa Special Intensive Revision (SIR), brigipa Financial Rules, bongagipa Service Rules, Dokgipa Public Accounts Committee (PAC), snigipa Digitalization of Payment, chetgipa Revoke the Transfer of Land and Revenue Act, 1976 (Mouza No.VI) aro skugipa Boundary-ko tariani, iarangan Indipendent candidate-rangni ming 9 manifesto-rang ong·a aro iarangko chu·sokatna ja·ku de·enga ine parakataha.

Ia tom·anio dingtang dingtang constituency-rangoni bakko ra·anggipa sak 7 candidate-rangara 3-Silkigre Constituency-ni Chusrang R.Sangma, 22-Jengjal Constituency-ni Tengrang A.Momin, 4-Rongrikkimgre Constituency-ni Clinton R.Marak, 20-Raksamgre Constituency-ni Jepprin D.Sangma, 2-Wagesik Constituency-ni Noresh M.Sangma, 20-Raksamgre Constituency-ni Sengkan A.Sangma, 16-Asananggre Constituency-ni Chesrang Ch.Marak.

Ia sak 7 candidate-rang, ‘na·simang election-o cheani ja·man gipin political dolo napgenma’ ine sing·anina aganchakengon, “chinga, darang political doloba napjawa aro chinga tangka paisa gari gorana mikboke da·alo chakatjaenga, indiba GHADC-ni ong·sianganiko nikesa, da·alo chinga A·chik jatna on·kange re·mikkangenga. Chinga bebe gita chena man·pagenchimode, chinga independent candidate-rara EC-ko rikna jotton ka·gen. Bebe gita gipin political dolrang ching baksa bakrimgenchimoba, chingni Resolution-o pangchake, Agreement-o soi ka·atesa rimnapgen. Batanggipa bilsirango National party-rang GHADC-o EC-ko rikaha, indiba A·chik jatni nangchongmotgipa, Garo Customary Law (GCL)-kon da·onaba pass ka·na man·chipkuja, GHADC-ko man·chengani da·o bilsi 73 gapaha. Darang EC-ba GCL-ko pass ka·na man·chipjaha. Ian A·chik jatna dal·bea ra·biani ong·enga” ineba Independent Candidate-rang parakataha.

Mingipin, maini gimin gipin jatrang GHADC election-o susana man·enga, GHADC-de A·chik jatnisa gipin jatrang susapana man·ja. Gipin jatrang A·chik jatni niam-retiko ma·siama ma·sija, gipin jatrang me·chikko noko donama donja, A·chikrangsa me·chikko noko dona. Me·chikko maini gimin noko dona, rorirang ma·sija. GHADC-ni ning·o dingtangmancha Sixth Schedule-ko on·aha, tribal manderangni Niam reti-rangko tarichina, indide gipin jatrang A·chik jatni Niam retirangko tarina man·genma, man·jawa. Gipin jatrangko GHADC-o MDC chakatna on·aniara dilgiparangni dal·bea gualani ong·a” ineba Independent candidate-rang parakataha.