Mangsang, March 6, 2026: A·chik Holistic Awakening Movement (AHAM) Mangsang Sub Unit, Mangsang jolo dingtang dingtang nanganirangko janape, a·dokni Skotong Minister Conrad K.Sangma-na Bristibar salo sedoataha.

AHAM Mangsang Sub Unit-ni parakatani gitade, Mangsang-o Auditorium dongjani gimin, plak officially nanganirangna tom·aniko ong·atna aro program-rangko ong·atna gita neng·nikaniko man·engani gimin, Mangsang-o Auditorium rike on·china, Skotong Minister-ko mol·molataha.

Mangsang jolo songdonggipa manderang saa ding·an salo, ramao a·sel ong·gipa manderangko gipin hospital-chi ra·angna, namen neng·nikaniko man·a, baksana basakoba songni nokni manderang hospital-o siode, uko nokona ra·bana gari dongjae neng·nikani ong·enga, private garirango sagipa aro sigipa manderangko salja, uni gimin jolni manderangna ambulance bolsako on·china gitaba janapataha.

Unbaksana pilak LP skul, SSA aro Adhoc skulrango nanggipa ki·taprang aro sechakani note bookrangko somoi gita sokjaenga aro bilsini bijangchio Syllabus-rangko dingtangatengani gimin, poraienggipa chatro chatrirang aro skigiparang namen neng·nikaniko man·enga ine janapatenba, ta·rake nirokatpachina AHAM Mangsang Sub Unit, Skotong Minister-ko mol·molataha.