Tura, March 5, 2026: Garo Hills-o songdongenggipa A·chikrangni a·arangko, dakbewal rikbewalrangko, niam retirangko aro Sixth Schedule-ni on·gimin bilrangko chel·chake rakkina aro mikkangchi name ripingangna gita, A·chik jatni a·arangko gipin jatrang maming dakeba brena aro ra·sekna man·jana gita, Garo Hills Autonomous District Council, Indian Constitution-ni on·gimin, Sixth Schedule-ni niamo ba bilo pangchake, GHADC-ni Deputy CEM aro Land & Revenue-ni Incharge, Nikman Ch.Marak ia rakbegipa niamrangko jinmana parakataha.

Gipin jatrang chong·motan rorirang darangba, Garo Hills-ni ning·o donggipa pilak a·arangko skatang brena ba ra·sekna aro bara ra·e dongna man·jawa.
Gipin jatrangna a·a on·ani aro dongchakna biap on·gipako, rorirang ra·sekna man·jawa aro ia dongimin niamko a·dok sorkariba aro bil gnanggipa authority-rangba maming dakba man·jawa.

A·chikrang darangba tol·e a·ako gipin jatrangni namgnina rakkina aro on·drana man·jawa. Ia u·iataniko ja·rikjaode ba niamko pe·ode, bil gnanggipa authority-rang a·ako ra·pilna man·a.

Gipin jatrang Land Transfer Act-o pangchake, a·arangko skatang brena ba a·kangna man·jawa, ia niamrangko skangonin A·chik ma·gitcham pagitchamrang ja·rikbaenga aro da·onaba A·chikrang ba Tribal manderang, ma·gitcham pagitchamrangni a·arangko man·rikrikbaenga. Tribalrangni a·ako darangba watatna ba transfer ka·na man·ja, ia niamko bil gnanggipa authority-rang ra·chakman·aha.

Iandake niam gita man·gimin a·arangko bil gnanggipa authority-ni maming ge·etani gri gipin jatrangna palna man·jawa ine ia ge·etaniko on·ataha aro gipin ge·etaniko man·taikujaskal, ia ge·etaniko ja·rikanggen, ine GHADC-ni Deputy CEM aro Land & Revenue-ni Incharge u·iataha.