Tura, Sep 25, 2025: Federation of All School Teachers Association of Meghalaya (FASTOM)-ni manchisogimin, gita da·al September 25 tarikoni jingjengatna a·bachengaha.

Meghalaya a·dokni Adhoc skulrango skigiparangko Deficit System-o on·china ba Deficit Pattern-ni Pay Scale-ko on·china dabie re·anggipa September 22 tarikonin Shillong-o jingjengataniko a·bachengataha. Apsandaken, Tura-oba FASTOM Indefinite Sit-in-Demonstration-ko New Tura Law College field-o da·aloni a·bachengatskaaha.

FASTOM-ni State Level President Moonroy G. Momin-ni u·iatani gitade, Garo Hills-ni pilak adhoc skulrango skigiparang re·bae bak ra·angtokaha.

Batanggipa 2019 bilsionin adhoc skulrango skigiparangko Deficite System-o on·china ba Deficit Pattern-ni Pay Scale-ko on·china dabie changni chang a·dok sorkarina memorandum-rangko on·ahachim aro gisik changni chang ra·atpiltaianirangkoba dakahachim. Indiba a·dok sorkari da·alonaba knachakjaengani gimin, adhoc skulrango skigiparang jingjengatna draataniko man·aha. Adhoc Skulrango skigiparangna on·enggipa dormaharang namen komiani gimin skigiparang, nokdangtangtangko chalaianio, dedrangko Skul poraiatanio, sagiparangko sanna bananirango, re·a doanirango aro dingtang dingtang songsalni kamrango bang·a tangka paisa chu·ongjae namen neng·nikanirangko man·tokenga ine Momin parakataha.

Shillong-o asonge jingjengatani ja·man, da·aloni Tura-oba, sima ari dongija, chong·motan indefinite sit-in-demonstration-ko a·bachengataha. Uni gisepon a·dok sorkarioni mamingkoba aganchakani dongjagenchimode, dingtang ja·kurangko de·anggen ineba FASTOM-ni President parakataha.

Jena kingking a·dok sorkari Adhoc skulrango skigiparangni dabianiko chu·sokate on·kujaskalna jingjengataniko dontongjawa ine Momin parakataha.