@ghdnews.in@

WILLIAMNAGAR, FEB 15, 2026:Gitcham A·chik National Volunteer Council-Breakaway (ANVC-B) dolni member-rang February 14 tariko East Garo Hills a·jani Williamnagar District Auditorium-o jinma tom·dake, an·tangtangni man·na nangenggipa rehabilitation package-ko sorkari on·kujaengani gimin chanchirimaha.

Iani bidingo ma·mong aro a·dok sorkarina chitti see u·iatgen aro gitcham ANVC-B dolni member-rangna sorkari dakchakaniko on·e, songsalo tom·tome janggi tangchina cholko on·gen ine ku·rachakgimin, tangka paisarangko ta·take on·china see mol·molanggen ine jinma tik ka·e, jak jak songe ra·chakangtokaha.

Indake ong·engon, iani bidingo tom·e chanchidilgipa gitcham ANVC-B dolni member Tokyo R.Marak-ni see u·iatani gitade, batanggimin, 2014 bilsini September jaon, ma·mong aro a·dok sorkari baksa songgigrikaniko dake Settlement Text Agreement (STA)-o soi ka·grikahachim.

Indiba da·o bilsi 11 batangpilahaoba, gitcham ANVC-B dolni member-rangni man·na nangenggipa rehabilitation package-ko sorkari on·kujaengani gimin, Marak suk ong·gijaniko parakataha.