@ghdnews.in@

Maibang, Feb 13, 2026: Bristibar salo, Maibang-ni Dishru Field-o jinma tom·niko ong·ate, Dima Hasao-ni dilgipa Daniel Langthasa-ko National People’s Party (NPP)-ona, NPP-ni National President aro Meghalaya a·dokni Skotong Minister Conrad K Sangma kusi ong·e rimchaksoaha.

Langthasa-ko NPP-ona rimchaksona tom·aniko ong·atanio, party-ni dingtang dingtang dilgiparang aro jolo songdongenggipa manderang bak ra·angtokaha.

Indake, tom·anio, NPP-ni National Working President James K Sangma, Vice President Hemochandra Singh, Tipra Motha Party-ni dilgipa Pradyot Manikya Debbarma aro Nagaland a·dokni gitcham Minister Mmhonlumo Kikon-ba dongpae bak ra·angaha.

Daniel Langthasa, an·tangna kam ka·gipa bang·a manderang baksa NPP-o napangaha aro ian Dima Hasao-o NPP-ko mangrakbatataniba ong·aha.

Ia tom·bimonganio, Conrad K Sangma, jinmana aganprakengon, Daniel Langthasa aro uni manderangko NPP-ni nokdangona kusi ong·be rimchaksoangenba, uamangni NPP-ona re·baniara, Tribal-rangko chel·chakna aro namroro silroroaniko ra·bana NPP-ni niksamsoani gnang kam ka·anio manderangni bebe ra·aniko mesokani ong·a ine Sangma aganaha.

Tribal-rangko chel·chakna, namroro silroroaniko ra·bana aro Salgro Salaram jolrango chadamberangna cholrangko on·na gita NPP, on·kange kamrangko ka·enga ine NPP-ni National President aganaha.

“Ku·cholsan ong·e, Salgro Salaram jolni dingtang dingtang a·dokrang aro Tribal jatrang, an·tangtangni daka rikaniko chel·chake ripingna aro namroro silroroaniko ra·bana kamko ka·engon, NPP-ni niksamsoe on·kanganiko Sangma parakangaha.