@ghdnews.in@

Tura, Feb 13, 206: Meghalaya sorkarini Tourism Department, Tura Hotel Polo Orchid-o Holiday Inn Resort-ko tarina Inter Continental Hotels Group (IHG)-ni proposal-ko ra·chakenba Land Handover Ceremony-ko ong·atangha.

Ia program-o, Skotong Minister Conrad K Sangma mongsonggipa sokgipa ong·e bak ra·angengon, unbaksa Tourism Minister Timothy D Shira aro PHE, Soil & Water Conservation and Housing-ni Minister Marcuise N Marak, IHG-ni representative-rang, sorkari official-rang aro gipin dolrang dongpae bak ra·angaha.

Indake, mongsonggipa manderangni dongpanio a·a pakwataniko dakangaha.
Skotong Minister, tom·anio jinmana aganprakengon, ia Five Star Hotel-ko Tura-o tarina man·aniara, gisik ra·gnigipa ong·a. Ia five-star aro four-star hotel-ni dingtanggrikaniko talate on·angaha.

Nambata sokachakani nokrangko nangengani gimin, manderangni sing·doanina aganchakengon, a·jao namroro silroroaniko ra·baon, an·chingo pilakkon nanga jekai rama, hospital, skul-rang, ringani chi uandaken, hotel-rangko nanga ine ua aganaha.

A·doko project-rangko ra·bae janggi tangani gadangko tang·doatengon, 2019 bilsini gisepo Meghalaya a·dokni man·gnirang $10 billion-ona tang·doatna niksamsoanirangko nipilatenba, da·alo $7 billion-ona sokahani gimin ru·utgijan $10 billion-ona sokdognok ineba ua aganaha.

“Iano ming 10 cholrang aro 10 Commitments”-ni bidingo talatangengon, private investment, tourism, arts & culture, sports, Urban transformation ba songjinmarangko namdapatani aro dingtang dingtang cholrangko jakkale chi siltong sale on·ani, chu·onga gita bijoliko on·ani, chu·onga gita internet-ko jakkalani, an·seng baljokaniko on·ani, aro songsalni namgnina kam ka·anio namdapani gimin ua aganangaha.

Indake, a·doko kror 8,000 mang Private Investment ka·anggen, jeon gong kror 130 hotel project-na chamgen.

Tangka paisani tang·doani, 2014 bilsio Meghalaya a·doko gong kror 6,811 mang koros ong·aoni 2015 bilsio gong kror 23,475 mangona tang·doaha aro Capital Investment ba gong kror 1,259 mangoni gong kror 6,395 mangona tang·doaha aro iarangan a·dokni kajina aro ma·mongoni kajinaoniko man·giparang ong·a ine Skotong Minister aganaha.

Re·baenggipa 2027 bilsio ong·atenggipa National Games-na Scheme-ko a·dok sorkari chanchisamsoenga aro una “Homestay-cum-Games Village” ine scheme-ko bikotna miksongenga ine Skotong Minister parakataha. Ia Scheme-ni ning·o Sports hostel-rangni bimango homestay-rangko rikna baneficiary-rang 70% subsidy-ko man·gen aro ia Games matchotahaode uamang ia homestay-rangko chalaiangna man·gnok ine ua aganaha.

Iarangna agreba Skotong Minister, mongsonggipa connectivity aro infrastructure-ko namdapatani gimin, Tura airport-ko taridaptaina aro gipin project-rang jekai IT park, medical college, Additional Secretariat aro Urban beautification-na gong kror 50-ko sorkari chamaha ine parakataha.

IHG-ni bidingo ia project-ko jako ra·e kam ka·enggiparangna nama sikaniko on·an baksa somoi gita project-ko matchotna nanggen ine mikrakataniko on·ataha.

Tourism Minister Timothy D Shira-ba jinmana aganengon, ia project-na a·ako sorkarini pakwataniara a·dokni tourism-o dal·a chu·sokani ong·a aro da·o donggipa gitcham nokrangko pe·grue gital five-star hotel-ko somoi gita rikgen ine parakangaha.

A·jaona tourist-rangni re·baani batroroengon, nambata gadango sokachaksona aro ia project-an iarangko chu·sokatna man·gen ineba ua agandapangaha.

InterContinental Hotels Group-ni Representative, Gautam Tyagi-ba tom·anio aganengon, Tura-o ia hotel-ko rikna cholko on·engani a·dok sorkariko mitelpilskaangaha.

Uamangni miksonganirangko talatengon, jolo donggipa manderangna kamko on·gen aro a·jaona re·bagipa manderangna nama sokachakaniko on·na aro hotel-o jatni dakbewalrang gita rikna miksongenga ineba aganaha.

West Garo Hills a·jani Deputy Commissioner Vibhor Agarwal, ia five-star hotel project-ara tourism-ni a·bao namdapatna sorkarini niksamsoanirangko parakani ong·a ine aganaha.

Tura songjinmao dingtang roaniko aro namroro silroroaniko nikna man·engaha ine ua janapangaha.