@ghdnews.in@

Shillong, Nov 6, 2025:Adita salrangna skang, South West Khasi Hills a·jao tangka dabidrae ra·ani bidingo rim·a man·gipa sakbonga manderang, Garo National Liberation Army-Regrouping (GNLA-R) doloni ong·ja ine a·dokni Deputy Chief Minister Preston Tynsong Butbar salo a·kangataha. GNLA-R-ni bimingo tangka gildrae ba dabidrae ra·enga ine matnangani bidingo, South West Khasi Hills pulisrangni rim·a man·gipa manderangoni saksade bilsi chu·ongkujachim.

“Da·odipet a·doko bobil dolko bikotpiltaia dongkuja, rim·a man·gipa manderang dingtangmancha namgija kamrangko ka·na miksongmanchae bikotgipa dol ba group-sa ong·a. Uamang namgija kamrangko ka·giparangsa ong·a, bobil dol ong·ja. A·dok sorkari da·odipet simsake aro mikkrake dongenga aro chinga darangkoba dongimin line-ko ga·batna on·kuja” ine Home Department-ko jako ra·e nirokenggipa Preston Tynsong aganaha.

Sorkari iarangni bidingo mikkraken kamrangko ka·enga aro jensalo iandakgipa koborko man·a raka ja·kurangko de·e kamrangko ka·enga ineba Tynsong aganaha.

Tangka dabiani lekkako man·soe aro GNLA-R-ni bimingo ma·sigija phone number-oni call ka·e ka·mikkenatahani gimin, bading chiwalgipa saksa re·anggipa October 28 tariko South West Khasi Hills a·jani Nonghyllam Pulis Station-o badi ka·ahachim.

Badinggipa saksani badi ka·anio pangchake pulisrang am·sandianiko a·bachengataha aro South West Khasi Hills a·jao donggipa Upper Rajapara songni saksa bilsi 25 ong·gipa Mann R.Marak-ko rim·na man·aha.

Mann Marak-ni ku·rachakanio pangchake pulisrang bilsi sokkugijagipa saksako man·chape sakbri manderangko chanchichipanio rim·dapaha. Rim·a man·gipa manderangara Upper Rajapara songoni bilsi 18 ong·gipa Marson R.Marak, bilsi 27 ong·gipa Babulin D Sangma aro Mulapat songoni bilsi 20 ong·gipa Tartus N Marak ong·achim. Indiba niamko ja·rike bilsi sokkugijagipa saksani bimingkode pulisrang parakatjaha.