GHD News, Oct 11, 2025: Garo Hills Autonomous District Council (GHADC)-ni ning·o donggipa a·kawe jolrango Non Tribal ba gipin jatrangko songni dilgipa aro Kananggu Mondol dake songaniko Niksamso Garo Community Organisation (NGCO) HQ Simsanggre raken jegalataha.

GHADC-ni ning·o gipin jatrangko dilgipa songaniara, Indian Constitution-ni Sixth Schedule ning·o on·gimin bilrangko pe·ani ong·enga ine NGCO parakataha.

NGCO-ni parakatani gitade, GHADC-ara Indian Constitution-ni Sixth Schedule-ni ning·o tribal manderangko chel·chakna on·gipa bilko man·e, Garo Hills-o songdongenggipa Tribal-rangni a·arangko nirokgipa aro bilko man·gipa ong·a. GHADC-ni ning·o Tribal ong·gijagipa manderangna bilko on·aniara Sixth Schedule-ni miksonganiko pe·ani ong·enga.

“GHADC-ni ning·o gipin jatrangni indake songni Sordar ba dilgipa ong·aniara ra·chakna man·gijani ong·a. Gipin jatni manderangko dilgipa songaniara GHADC-ni niamrangko pe·ani aro Tribal-rangna on·gimin bilko ra·sekani ong·a. Koborko man·soani gitade, gipin jatrangko Kananggu Mondolrang, gipin biaponi re·bagipa manderangna a·a Pattarangko on·engani a·selan, a·kawe jolrango niam gri a·a ra·e songdong a·chagiparang batroroengaha,” ine NGCO-ni President Tengrak Marak parakataha.

A·kawe jolrango niam gri napsrukbae songdong a·chaanirang batroroengani a·selan, ong·gija dakgipa kamrangko ka·anirangba batroroenga. GHADC-ni ning·o Tribal ong·gijagipa manderangna on·gimin a·a Pattarangko den·galpilchina aro Sixth Schedule-ni ning·o donggipa pilak songni Sordar, Kananggu Mondol aro gipin dilgiparangko ra·galenba, A·chikrangko Kananggu Mondol dake songchina NGCO dabiangaha.

GHADC-ni ning·o niam gri napsrukbae songdong a·chaengipa manderangko champengna gita bilakbate nirok sandianirangko dakchina gitaba Marak GHADC-ko didiataha.