GHD News@

ghdnews.in

Tura, Oct 27, 2025: October 25 tarik Sonibar salo Rock Revival Music Society (RRMS) baksa Meghalaya AIDs Control Society, Shillong, Tura District Auditorium-o Concert-ko ong·atangaha.

Ia Concert-ko ong·atani miksongara da·ororo HIV bs AIDS sabisirang giprorobatengani gimin, uko champengna aro sabisi man·giparang maikai seng·gnang porikka ra·e, janggi tanganiko bakrobate mandesal ong·e, songsalo janggi tangpana man·gen, uamangni gisiko knatogipa sulrangchi doka dam·anichi aro gitrangko ring·anichi ka·dongataniko on·na man·na gita doka dam·aniko be·en ba gisiko nangdike u·ianiko on·na miksongani ong·a.

HIV ba AIDS ian me·a aro me·chik skatang jebasi rorim dongrimanichi altuae batna man·gipa sabisi ong·a. Uni gimin condom-rang ko jakkalgenchimode, naljokaniko man·gen.

Da·ororo bang·bata chadamberangan pekgipa bosturangko jakkale biji ge·sanchi su·anichi HIV positive ong·enga. Chadamberang iandake namgija ramaona re·anganira gisikni gita bilgrianichi pekgipa samrangko jakkale an·tangangni neng·nikaniko chel·atna chanchie jakkalrikrika a·sel ong·enga. Ia namgija ramaoni namgipa ramaona an·pilbana gita amrongja. Indiba uamangna namgipa cholko on·na gitan a·dok sorkari Tura Civil Hospital-o OST Centre-ko donaha, unona re·ange porikka ra·e gisikko bilakatna Councelling-ko on·ne janggi tanganiko bakrobatatna namgipa samrangko on·ne sanna bananiko dakenga. HIV porikka ra·na gita jajrengna nangja, maina uko jinmana parakja.

Mittam manderang atchikapaonin, HIV positive ong·giparang donga, ma·gipa HIV man·anichi bi·saba sabisiko man·paa. Uamangba jajrengna nangja, seng·gnang porikka ra·e sanode, ramram mandesal ong·e janggi tangna man·aia.

Jemangan, HIV ba AIDS positive-ko man·a, uamangna kenani ba jarengna nangani dongja, apsan cha·brinachi batrikrikgipa sabisi ong·ja. Da·o chu·gimik sak 308 HIV positive man·giparang donga. uarangoni bang·batan drugs biji su·giparang ong·a, positive ong·giparang sak 308-na baten donga, indiba bang·batan porikka ra·e nija kratchae jrip kene dongiparang donga. Uamang OST Centre-ona re·ange porikka ra·na man·gen. Porikka ra·giparangko chinga jinmana parakja, ine Dr. Isilda D Sangma aro Dr. Riksilchi M Sangma HIV positive ong·giparangko porikka ra·pachina didiangaha.

Jerangan HIV postive ong·a, uamangko chonnike ba intake kratcha·ata, uamang bilsi gittamna pattoko dongna nanggen aro tangka gong lak sako gamna nangen ineba parakangaha.

Mikkang chango concert ong·ataio open air ba amphitheatre dakgipa biaprango ong·atchina Rock Revival Music Society-ko didiangaha, maina unosa chadamberang jemangan doka dam·anio gisiko nanga, uamang an·tangtangni changa sapaniko mesokna gisiko cha·suani sokbagen aro mikangchi susaaniko ong·atode, HIV-ni gimin gitrangko see, pekgipa bosturangko jakkalgiparangko gelatna ba chel·atna gita dakchakani ong·gen aro HIV positive maidake ong·engachim, uko champengna dakchakbeani ong·gen ine Tura-ni MDC Bernard N Marak aganangskaha.