GHD News, Adokgre, Oct 24,2025: North Garo Hills a·jao donggipa Adokgre jolni diltubegipa A·chik song damgittamo, sorkarini maming dakchaknirangko man·jaenga aro mongsongbate skulrango poraina gita bi·sarang birth certificate, residential certificate, caste certificate, income certificate, election identity card aro dingtang dingtang nanggipa lekkarangko tarina man·jaengani a·sel namen neng·nikaniko man·enga ine u·iataha.

Koborna u·iatani gitade, ua song damgittamara Chiginde, Doeni aro Balsrik songrang ong·achim. Ua songrangara West Khasi Hills a·jani Mallangkona aro Assam a·dokni sima ari jolo ong·a. Balsrik songo sak 1700 mangni gita manderang donga, Chiginde songo nokdang te 72 aro sak 420 manderang donga aro Deoni songode te 39 nokdangrang aro sak 159 mang songdonggipa manderang donga ine parakataha.

Ua obostani bidingo dolsa NGO chong·motan, Garo Omniscience for Ethnic Renaissance & Awakening (GOERA), HQ CEC, Tura-ni dilgiparang re·angenba, ua songni manderangko gronge sing·sandianiko dakon, ua song damgittamni manderang, India a·songo songdonggipa manderangan ong·a, ine mesokna maming lekkarang dongja aro nanga lekkarangko tarina gitaba uamango maming sakkirang ba authority-ni see jote on·gipa lekkarang dongja ine ma·sina gita man·aha.

Ua songni manderang baksa agangrikani ja·mano, GOERA-ni dilgiparang, ua song damgittamni bidingo talataniko on·china, Garo Hills Autonomous District Council (GHADC)-na sedoataha.

“Ia song damgittamni manderang, badia a·doko ga·aka, uamangni gadangara maichim, ukoba uamang ma·sija aro ia songo sorkari skulrangba dongja aro sorkarini on·enggipa namgnirangkoba man·jaenga. Ia songni manderang, maming dakchakani gri ong·engon sanona re·anggen aro sani dakchakaniko bi·gen, ukoba ma·sitokjaenga,” ine GOERA-ni President Thomas Marak parakataha.

Thomas Marak-ni parakatani gitade, ia songni manderang, an·tangtangni songko GHADC-o ra·chakchina batanggipa 2014 bilsion dorgastoko galaha aro GHADC-na house tax ba nokni kajinarangko gamengachim.

Indake ong·engon, ua songna 2022 bilsion Village Code-ko on·ahaoba dingtang dingtang office-rango, nangchongmotgipa Certificate aro gipin lekkarangko on·na jechakenga ine GOERA parakataha.

“Ia songni manderang, nangchongmotgipa lekkarang dongjani a·sel Birth Certificate, Income Certificate, Caste Certificate aro Residential Certificate aro gipin nangchongmotgipa lekkarangko taripana man·jaenga. Songni manderang kamrangko ka·na, lekka poraina aro sorkarini Scheme-rangko ra·na gita, uandakgipa lekkarangko uamangna nangchongmotachim,” ine Marak parakataha.

Ua songni manderang, ma·mong sorkarini dingtang dingtang Scheme-rangkoba man·pajaenga aro uamangni bagan-bari aro ma·manti gam-jinrangni lekkarangko tarianio namen neng·nikanirangko man·engani gimin an·tangtangni gam-jinrangko gimaatnaba donga ine GOERA-ni President parakataha.