Tura, August 21, 2026:
Kherapara-oni Diganggre-ona dakanggipa PMGSY ramako PWD road-ni Engineer-rang baksa Contractor, Sairill D. Marak aro jolni manderang August-ni 20 tariko jinma niangaha.

Barengapara SUb Division ning·o donggipa Kherapara-oni Diganggre-ona dakanggipa PMGSY ramako kam ka·a namjani gimin, technical aro quality-ni bidingo nirokna gita PWD Dalu Division-ni Engineer aro PWD (Roads) Tura Circle-ni Superintending Engineer aro M/S JC Infra Corporation Ltd-ni manderang, Amongpara-ni TMC Candidate Sairil D. Marak aro jolni manderang apsan re·ange niangaha.

Ua PMGSY ramako re·ange nianiara, JC Infra Corporation Ltd-ni rama tariarang namjani gimin battanggimin somoio Sairill D Marak, bil gnanggipa officer-rangna badi ka·doangahani gimin, August 20 tariko PWD-ni Engineer-rang baksa songni manderang jinma re·ange nieaha.

Sairill Marak-ni u·iatani gitade, ramarang aro nalarangko namgijagipa bosturangko jakkale kamrangko ka·ani a·sel ramarang aro nalarang namarangjachim.

Marak-ni badi ka·aniko man·soe, PWD department-ni officer-rang, M/S JC Infra Corporation Ltd-ni contractor an·tangni namgijagipa kamrangko donnuna gita rama aro nala tarigiminko niena skangan an·chengko buringchi ra·galsoaha.
Indake ong·genchimoba, uamang an·tangtangni kamko donnuna man·jaha ine Marak parakataha.

Uandake mikkangchi badi ka·ani ja·mano sakkiko gimaatna jotton ka·genchimode, niam gita case ka·gen ine Marak mikkrakataniko on·angaha.

Manderangni namgnina sorkarini on·atgipa tangka paisarangko namgija dake jakkalna man·jawa aro PMGSY ramako kam ka·na DPR-ni ra·chakgimin gitan, technical specification-ko name kam ka·china, Marak Department-ko aro Contractor-ko didiangaha. DPR-ni ra·chakgimin gita mikkangchi tarijaode, nie dongjawa ineba Marak parakataha.

Indake Inspection-ni technical findings ba report-ko ta·rake on·china gitaba Marak department-ko didiangaha.