@ghdnews.in@

Tura, Dec 8, 2025:Garo Hills-o gitchambatsranggipa dolsa Garo political party Garo National Council (GNC) Tura-o tom·bimonganiko ong·atangaha.

Ua tom·aniko GNC Youth Wing, Tura-ni dilgipa Pa Austin Chalebone B. Marak-ni ku·rangchi Isolo bi·e a·bachengataha. Uandake A·chik National Anthem, ‘Ang Songko On·bo’ ingipa gitko ring·e bilsini tom.bimonganio jinma A·chik jatko ma·ate, gisik ra·e ring·chengaha.

Chanchianirangko joljol tom·aniko dilgipa, GNC-ni Vice President Pa Nikman Ch. Marak, a·bachengdilaha. Ia tom·bimonganio A·chik A·songni pilak biaprangonin GNC Candidate-rang tom·batokaha aro sak hajalsa mang dilgiparang bak ra·angtokaha.

Uandake chanchianirangko re·baengipa MDC election-o namgipa candidate-rangko A·chik A·song gimik maikai krongko tarina man·gen, una miksonge chanchiangaha.

Dilgiparangara Austin C. B. Marak, Obaistone M. Sangma, Niti G. Momin, Bondas B. Marak mangko seokangaha.

Re·baenggipa MDC election-o maikai kamrangko ka·gen, Election Strategy Committee-ni dilgiparangko seokangaha, uarangara Jesse Ch. Marak, Bilo A. Sangma aro gipin dilgiparangkoba seokangaha.

Mingipin chanchianiara, GNC-ni gitcham dilgipa Pa Clifford R. Marak-ni siani salko re·baengipa bilsio manina tik ka·angaha. Mingsara Garo National Council (GNC)-ni dal·begipa tom·bimonganiko Simsangre chijolo ong·atangna jinma jak songe ra·chakangaha.

Re·baengipa MDC election-o susana sienggipa GNC-ni Candidate-rangara Te Chibasal Lampard R. Marak, Simsangre, Pa Jakrak A. Sangma, Amongpara, Te Geobar Salgrik B. Marak, Asananggre, Pa Augustine R. Marak, Silkigre, Pa Nikman Ch. Marak, Rongrikimgre,

Tom·anio GNC-ni General Secretary Augustine R.Marak, indake aganaha, “A·chik A·songko mikkangchi rikna, battangimin salrangko wate mikkangchi apsan ku·monganiko man·na sakantian rakbate kamrangko ka·na nangenga’ ine parakangaha.

Rudreshwar Ch. Momin, jean East Garo Hills, Garo National Council (GNC)-ni President ong·engachim, “An·ching GNC-ni miksongako gimik biaponan u·iatrikrikatna nangenga, mikkangchiba bang·en ku·monganiko on·na nangenga, hai A·chik A·song gimik ku·mongna an·tangtangko on·kangna” ine ku·mongangaha.

Simsanggre-ni GNC candidate, Chibasal R. Marak, ‘Angni ama apani song atchiram a·songtang A·chik A·songna, GHADC-o dangdikna chakatenga, uni gimin sakantian ku·mongpachina mol·molangaha’.

Te Geobar Salgrik B. Marak Asananggre-ni Candidate, ‘Angni MDC-na ong·katanide an·tangko on·kange, re·baniara A·chik A·songna GNC-ni Manifesto-o pangchake chu·sokatna aro GHADC-o dangdike on·na miksonge chakatenga’ ine pakatangaha.

Amongpara-ni candidate Jakrak A. Sangma, ‘India-ni ma·ambio GNC-ko ripingna, A·chik sakantini ku·monganiko on·na nangengaha, uni gimin pilakan Nokgipao pangchake cheaniona re·chakatna’ ine aganangskaha.