Tura, Oct 12, 2026: Garo Hills Autonomous District Council (GHADC)-ni constituency-rangko gital dake sima salpiltaiani bidingo GHADC-ko election-ko ong·atninggija GHADC-ni term-ko ra·dodaproroenganina Tura-ni MDC aro Bharatiya Janata Party (BJP)-ni State Vice President Bernard N Marak sing·doataha.

Iani bidingo a·dokni Deputy Chief Minister aro District Council Affairs (DCA) Minister Prestone Tynsong-na sedoatenba, Delimitation Committee-o political party-ni manderangko bak ong·ataha ine adita salrangna skang ong·atgipa GHADC session-on parakangahano gimin ua manderango ka·dongchakna man·gijaniko ra·baaha ine Marak parakataha.

Marak-ni parakatani gitade, ia Delimitation Committee-ni Chairman aro mitam Member-rangaar, Political Party-rango bak donggiparangsa ong·a aro mitamde National People’s Party (NPP)-ni Member-rangan ong·a.
Political party-rangna bak on·paani giminde, ong·gija dakanirangko mesoka ong·ja ine ku·rachakangengon, GHADC-ni constituency-rangko gital dake sima salpiltaianio maming ong·gija dakanirang dongjana gita sorkarian daitoko ra·na nangachim ine Marak parakataha.

Constituency-rangni simarangko salpiltaianio manderang baksa chanchirimchengani dongja ine sorkariko sing·doatenba, iani bidingo District Council-ni seoka man·gipa Member-rangna mamingkon u·iatjaha aro an·tangtangni nangnikanirangko ku·pattie on·naba gita cholko on·jaha ine Tura MDC matnangataha.

Constituency-ni simarangko taridapengon, pangnan seoka man·gipa dilgiparang aro constituency-ni manderang baksa agangrikchengna nangachim ineba Marak parakataha.

Constituency-ni simarangko taridapanio maini gimin, election-na skang matchotatna man·jaha ine sing·doatenba, simarangko taridapanio maini gimin manderangni chanchiani aro nangnikanirangko ra·na gita public hearing-rangko ong·atjaha ineba Marak sing·doataha.

GHADC-ni term-ko da·o jadokna ra·dodapattaiahani gimin, sorkariko sing·doatengon, constituency-rangni simarangko gital dake salpiltaianiko matchotatna council-ni term-ko ra·dodaptelna nangahama ma ian election-ko ong·atninggija donna gita miksonganisa ong·ama ine Tura MDC sing·doataha.

Indake, delimitation proposal-ko jinmana chapa ka·e on·china, nangchakea man·gipa constituency-rango public hearing-rangko ong·atchina, MDC-rang aro Nokmarang baksa tom·anirangko ong·atchina aro Delimitation Committee-ni bidingo jinmana parakchina Marak dabiangaha.

GHADC election-ko ta·raken somoi gita ong·atchina gitaba Tura MDC dabiangaha.