@ghdnews.in@

Chocpot, Nov 5, 2025:South Garo Hills a·jani Chokpot Civil Sub Division-ni ning·o donggipa Paromgre songo koela bikotaniko songni manderang aro Chokpot jolni nangrimgimin NGO-rangni jegalata ja·man, ua biapo Scientific Mining ka·na Licence man·gipa Georgemon S.Marak-ni badi ka·anina songni manderang raken jegalataha.

Georgemon Marak-ni badi ka·aniko rongtale ma·sina man·kujaoba, uni badi ka·ani aro matnanganiara kakket ong·ja ine songni manderang parakataha. Koborna u·iatani gitade, Marak Paromgre songni sak 8 manderangni kosako badi ka·aniko songni manderang, raken jegalatskaha.

Georgemon Marak-ni badi ka·gipa sak 8 manderangara Pondit C. Marak (Chra), Roster C. Marak (Chra), Cracker R. Sangma (Nokchik), Clearbeston Ch. Marak (Nokchik), Probath Ch. Marak (Nokchik),Esabila C. Marak (Nokchik), Waibin N. Sangma (Nokchik) aro Boston C. Marak (Nokchik)

“Chibilbang-o donggipa feet 2800 ong·gipa quarry-ko 2010 bilsini December 18 tariko palaha, indiba ua quarry-ko Scientific Mining daknade paljachim. Scientific Mining-ko dakna on·gipa quarry-de Chibilbang-o ong·ja, indiba Guang Dare-osa ong·achim. Indiba Scientific mining dakna Licence man·gipa Georgemon Marak, chingni kosako badi ka·ahani a·sel da·o songni manderang jajaani ong·enga aro neng·nikanirangko chagrongenga” ine Paromgre songni manderang parakataha.

Chibilbang-o koela bikotenggipa biapde Scientific mining-na on·gipa biap ong·ja. Paromgre A·kingo koela bikotaniko songni manderang raken jegalangaikugen ine songni manderang parakataha.

“Uni gimin Georgemon Marak-ni tol·e matnanganiko aro manderangni kosako kragija badi ka·aniko chinga raken jegalenga” ine songni manderang parakataha.