Tura, Nov 1, 2025: Warachakenggipa dolni dilgipa Dr. Mukul M Sangma, East Garo Hills a·jani rama jal·langrangko namdapatna tangka paisa chamgiminko hisap ka·e sandie niangaha aro PWD Department-ni Official-rang baksa rang·gitik a·sel ong·ronggipa biaprang jekai Samanda bazar-ona ong·ongipa rama, Rondap Songital rama gonggegipa, Songsak bazar, Dagal ramao nala donggija chi sikonge rama nosto ong·giparangko aro rama gonggegipako sronge tarichina aro accident ong·ronggipa biaprango sign board-rangko songe donchina didiangaha.

Iarangko tarina gita ma·mong sorkarini chamgimin tangkarang dongani gimin ta·raken tarichina didiangaha. Ian road safety ba ramao rang·gitik a·sel ong·aniko simsakna man·gen.Uni gimin je ramaon gonggegipa dongachim, uarango dokkan dakgipa biaprango parking bay-ko tarichina gitaba Dr Sangma, PWD Dept-ni official-rangko didiangaha.

St. Joshep Secondary skul aro Dagal A·pal Deficit UP skulrango poraigipa chatro chatrirang bang·en dongani gimin, skul bi·sarangna rama re·na gita footpath aro zebra Crossing-ko tarie on·china gitaba aganangaha. Songni nokni anti cha·na charam biapona Mahindra pick up garirango re·giparang gariko salengon uamangko speed limit-o salchina gita Pulis department-ko rikrokchina aganangan baksa anti cha·chakram biapo rama dilgni donggipa jekai Nangapa anti, ua biapo Zebra Crossing aro parking bay-ko tarie on·china PWD Dept-ko agandapangaha.

Songsak-ni rama sorok gonggerangko tariengon, Nagaland aro Manipur-o ro·ong romtomdape rang·gitik a·sel ong·a gita ong·jachina, ua biaprango sign board-ko donchina didiangan baksa rama tario jakkalgipa dumper garirangni ta·rakdugae salaniko Pulis department-ko nirokchina didiangaha.

Songkama Rongal dollongko ton 9-onasan gario bosturangko gate ga·batna ba salbatna gita mikkrakataniko on·genchimoba, una bate FCI-ona mirong salgipa truck ton 27-rang ba bag 520-rangko salbatenga, uni gimin ua dollongko ton 9-na bate salgenchimode, Pulis department uko niroke kam ka·china aro uano sign board-ko donchina aganangaha. Unbaksana Williamnagar-o donggipa Loyola Higher Secondary Skul rama-na 2017 bilsio sanction ka·gipa ramako 2025 bilsionan matchotkujaengani gimin, ukoba ta·rake matchotarchina, Engineer-ko didiangaha.

Williamnagar-oni Nengkra-ona km 20 ong·gipa MITP rama jal·lang 2019 bilsioni phase 1-ko matchotna nangachim, da·alonaba matchotkujaengani gimin, uko ta·rake matchote on·china didiangaha.

Re·anggipa bilsio Williamnagar-ni Dama Chiringko kasotengipa dollongko rikna a·bachengahaoba ia bilsi bon·angonan matchotkujani gimin uko Contractor-rang baksa nienba uko ta·rake kamko ka·enba ia bilsi bon·na skangan matchote on·china aganaha. Uandake Williamnagar Hospital-o rang·gitik a·selrango maidake sanengachim, uarangko Superintendent, Doctor aro Nurse-rangko grongenba, hospital-ni obostako nianga ja·man Williamnagar-ni Circuit House-o Road safety Committee baksa chanchirime, East Garo Hills-o rang·gitik a·sel ong·genchimode, Williamnagar Hospital aro Songsak PHC-rango nang·gitiko sana bana neng·nikengon, Trauma Centre-ko nangenga ine nikaha, indiba je Doctor, nurse-rang dongachim dingtangmancha apsan bodolgrike kam ka·ode name sana gita man·aigen ine Dr. Sangma ku·patiangaha.

Chadamberang mongsongate bike salgiparang kenbegnigipa kamrangko dake nina sikani (Adventurous)-ko niroke simsakna Pulis Department-ko rikrokchina didiangaha aro East Garo Hills-ni dingtang dingtang bakrango CCTV camera-ko tekna nangenga ine nike, road Safety-na chamgimin namroro silroroanina aro technology-na tangka chamgiminko jakkalchina Dr. Sangma didiangaha.