ghdnews

Tura, Nov 1, 2025: Re·anggipa 2017 bilsiioni Ampati Baksapara songo rikenggipa Commerce aro Science College-ko Dr. Mukul M Sangma re·ange nieaha.

Ua College-ko rikna gita Baksapara Songni Nokma bigha 53 a·arangko on·aha aro ua College Building-ko rika da·onaba matchotkujani gimin, Dr. Sangma re·ange work plan-ko nirokengipa department-ko ta·rake kamko matchotatchina Department-ko agan-ku·pate, re·baengipa 2026 bilsio Academic Session-ko a·bachengatna jotton ka·china didiangaha.

Sorkari ia kamrangna post sanction ka·ani gimin sing·on, teaching aro non-teaching staff-na sanction ka·e Principal-ko donataha ine sorkari aganchakaha. Uni gimin,
Contractor-rang niam gita kamko matchotja ong·ode, department, contractor-rangni kosako ja·kuko de·anggen ine aganaha.

Sorkarini development-na a·arangko on·gipa a·a nokgipa aro maharini dedrangrangna sorkari kamko on·na gita Dr. Mukul Sangma-ni Skotong Minister ongmitingon niamko taraiaha ine parakatenba, Am·beng jolo Commerce aro Science College-ko ra·baanira, poraienggipa chatro chatrirangna bang·en namgni ong·gen. Ia college-o poraianiko nike poraigija dongenggipa bi·sarangba sakgipini poraiako nike dal·na chuna sikani gisik donggen aro jerangan MSC aro M·Com poraia matchote kam gri dongengachim, ia College-o kamko ka·na namgipa chol ong·gen ine Dr. Mukul M Sangma aganangaha.