Tura, Oct 19, 2026: Bilsianti manironga gita, A·chik jatni dal·batgipa maniani, 100 Drums Wangala Festival ba Dama Bol 100-ko Doke Wangalani bilsi 50 gapaniko ia bilsio Golden Jubilee manina biaprangko tarisoenga aro ia chango Dama Bol 1000-ko doke Wangalaniko sokachakna, Chibragre Wangala A·damko tarisoani 75% percent matchotaha.

Ia dama bol 100-ko doke Wangalaniko 1976 bilsio a·bachengaha, indake ia chango bilsi 50 gapaniko Golden Jubilee manina tarisoenga aro ia chango Dama Bol 1000-ko doke Wangalgen, ine 100 Drums Wangala Festival Committee-ni Chairman Pa Ronald Rikman Ch.Sangma aganaha.

Pa Sangma-ni aganani gitade, ia 100 Drums Wangala Festival-ko a·bachengataoni da·o bilsi 50 gapaha aro ia bilsi 50 gapaniko Golden Jubilee manina Chibragre-o donggipa Wangala A·damko tarisoani 75% percent matchotaha. Da·o bangki dongkuenggipa 25% percent-ko ta·raken matchotatgen. Ia changni Wanglao Dama Bol 100-ni palo Dama Bol 1000-ko doke Wangalskagen, ineba ua aganaha.

“Chinga ia kamrangko ka·na gita sub committee-rangko donaha aro uarang dingtang dingtang kamrangko jako ka·enga. Ia chango Dama Bol 1000-ko doke Wangalna tarisoanio chinga bang·a neng·nikanirangko chagronggenchimoba, chu·sokaniko man·na ka·donga” ine Pa Sangma aganaha.

Ia chango Dama Bol 1000-ko doke Wangalanio dingtang dingtang a·dokrang jekai Assam, Tripura aro Nagaland a·dokrangoni re·bae bak ra·anggen aro Garo Hills-oniba district ge·antini Wangalgipa dolrang bak ra·anggen ine Chairman aganaha.

Ia Wangalaona gipin a·songni Tourist-rangba sokbagenma ine sing·anina aganchakengon, bang·a tourist-rang mongsongbate Europe a·songoni, WhatsApp gita kobor-rangko ra·atenga. Uni gimin ia chango Dama Bol 1000-ko doke Wangalanio bang·a tourist-rang sokbagen ine ka·dongsoenga ine Sangma aganaha.