Shillong, Oct 19, 2026: India a·songoElectoral Roll-rangko nipiltaina gita Special Intensive Revision (SIR)-ko ka·anio ‘kragija kamrangko ka·engani gimin’ matnange, Chief Election Commissioner (CEC) Gyanesh Kumar-ni kosako jegale uko ra·galchina, Cockroach Janata Party (CJP), a·songni pilak biaprangon dabie jingjengatanirangko dakengon, CJP-ni dabianio, a·dokni skotong songjinma Shillong-oba adita chadamberangba chakpaaniko parakataha.

A·songni niam bidikko pe·anina ma·mong sorkarini kosako jegalattokengon, iandake ong·gija kamrangna ku·rang on·enggipa manderangko ma·mong sorkari, a·songni kosako chakatgipa ine matnangenba, jegalgipa manderangni kosako UAPA gita dakgipa niamrangko ra·gatnaba donga ine Shillong-ni chadambe Bhakupar, an·tangni jajrengchakaniko parakataha.

Ian a·songni niam bidikna namen kragijani aro ra·chakna man·gijani ong·a. CJP-ni member-rang, dingtang dingtang dake ku·rang on·enb, chadamberangni namgninasa ku·rangko on·enga aro uamangni nangnikanirangko sorkari chu·sokatna nanga. Jakgitel ong·gipa a·songo, sorkarini manderangko sing·doaniara, a·songna aro mikkangchina daitoko mesokani ong·a aro ian a·songni kosako chakatani ong·ja,ine parakataha.

Election Commission of India (ECI)-ni Chief Election Commissioner (CEC)-ni namgijagipa kamko jegale jingjengataniara, a·songni on·gimin bilo pangchake jegalaniko mesokani ong·a ine sakgipin Mominul Haque aganskaaha.

Haque-ni aganani gitade, jakgitel ong·gipa a·songo, ong·gija dakgipa kamrangko jegalna Article 19-ni ning·on bilko on·manaha aro jegalgiparangni kosako sorkarini ja·kuko de·aniara kraani ong·ja. A·songni manderang, maiba kamna suk ong·nikjaenga ong·ode, jegalna gita bilrang donga ine sakgipin John F Marbaniang-ba parakataha.

CEC-ni kosako matnanganirangko jakgitele sandirokatchina HYC-ni gitcham President Robertjune Kharjahrin-ba didiataha aro election-ni kamrangko pangnan kakket aro bebeo kam ka·na nanga ine dabiangaha.

“CJP aro a·songni chadamberang jegalanirangko dakna bil donga. Uamangni kosako sorkarini ja·ku de·anina suk ong·nikjae ku·rang on·aniko jripatna jotton ka·anisan ong·aia aro iako a·songni manderang ra·chakna man·jawa. A·songko chalaigiparangni kosako jegalaniko knachakna ka·donggipa ong·na nanga. Jegalenggipa manderangko rim·e, jingjengataniko jripatna man·jawa. Uni gimin, CEC kam watana nanga aro una agre mamingba chol dongjaha,” ine Kharjahrin aganaha.