@ghdnews.in@

Tura, Nov 4,2025: West Garo Hills a·jani mongsongbate a·kawe jolrango niam gri bol ratani karkanarangko jakkalengan baksana Garo Hills-ni dingtang dingtang biaprangoniko bolrangko cha·ue gipin a·dokrangona badingsrukatenga. Uandaken, niamgri bol cha·ue salangenggipa gari bolsako rim·na jotton ka·engmiting somoio, attechi den·a ka·mikkenatahani gimin, Anwar Islam minggipa mandeni kosako October 29 tariko Social Activist Jaynie N Sangma, badi ka·doangaha.

Jaynie N Sangma-ni badi ka·gipao janapani gitade, October 29 tarikon ua, an·tangni driver baksa Rajabala-oni Batabari rama gita Tura-ona re·bapilengmitting somoio ua, ML-08B 4111 pik-up gari bolsako Sidakandi songo grongaha.

Ua garini manderang, uamangko nikon, rang·san garioni ong·kate gariko gale katahani gimin, uamang garioniko am·sandion, bol gantongrangko gate salangengachim. Indake ja·mano ua biapona, garini nokgipa, an·tangni jikgipa baksa re·bae, an·tangni gariko watpilchina mol·molenba, tangka gong 10,000-ko gus on·na jotton ka·aha.

Ua tangkarangko ra·na jechakon, garini nokgipa aro niam gri bol badingenggipa Anwar Islam, an·tangni garioniko atte bikote, uamangko den·na ka·mikkenataha ine Jaynie Sangma, badi ka·gipa lekkao janapaha.

Ua manderang, Social Activist-ko so·otna jotton ka·ahani gimin, ua manderangni kosako ta·rake am·sandianiko dakenba rakgipa ja·kurangko de·china Jaynie Sangma pulisrangko didiataha.