Tura, Oct 30, 2026: A·chik a·songo gipin jatrangchi neng·nikataniko man·engipa Wadagokgre songo tom·aniko ong·ate Nokmarang, jolni manderang aro NGO-rang jekai GSMC, ACHIK, FKGJP, ASPF, DIMDAM, GOERA, GSU, ASWA, ADIL, APA, Joint Action Committee (JAC), A·chik jatko Warachakna biltangko ripingna jinma ku·monganiko on·angaha.

Tom·anio GSMC-ni Chairman Balkarin Ch Marak dongpae, “A·chik jatna bilko 1952 bilsio on·aha aro iako A·chik jat gimik ripingna nangenga. India-ni ma·ambio bilko on·e, GHADC-ko on·aha. Uko an·ching bilakatna nangenga. Da·alo India a·song rasong gnange, Tribal jatko President man·aha aro uan Jharkhand a·dokoni ong·a. Anga GSMC-ni bimango A·chik a·songni gimin agangrikna, India a·songni President-ko New Delhi-o grongeaha. Da·alo an·ching, Rev. Gilberth K. Marak-ni agangipa, ‘Garo Hills Damgipin A·gisi’-ko da·alo gipin jatrang an·chingni bilko, gam-jinko, A·chik me·chikrangko ra·sekdraengjok, iarang gimikkon raken champengna nangengaha. Sixth Schedule, an·ching A·chik a·songna namen bilakgipa niam ong·a. GHADC-ba an·chingna bilakgipa ong·a” ine GSMC dilgipa aganaha.

ACHIK-ni General Secretary (Administration) Johny A. Marak, “An·ching A·chikrang an·tangni man·gimin bilko ma·sie jakkalna nangenga, ong·jaode gimaataona sokgen. Dilgiparang dingtang dingtang dongimin ma·ambio pangchake MDC-rang, MLA-rang chel·chakna seokgiminrang chanchiani a·bakkuko ra·na gisik nanjaenga. Seokgimin dilgiparang gisik nangjaode, A·chikrang gimagen. Uni gimin an·ching A·chik sakanti apsan ku·mongna nangenga”, ine aganaha.

“Skangonin dingtang dingtang dolni dilgiparang dakgrikbaenga, indiba chu·sokna ba A·chikrangko chel·chakna man·jaenga. Uni a·selan A·chik me·chikrangko bang·en ong·siataha. A·chikrangni a·arangko
rorirang bang·en ra·sekdraaha. Una agreba bol wa·arangko skatang ong·gija dake Nokma A·kingrangoniko ra·sekaha aro nosto ka·aha. Uni gimin raken ja·ku de·na nangengaha” ine jolni dilgipa saksa aganaha.

Tom·anio Wadagokgre songo ong·anggimin obostarangni bidingo GHADC-ni gita, maming ja·kuko de·jaha, batesa a·a pattarangko rorirangna tarie on·enga. Indake GHADC-ni dilgiparang skatang a·a pattarangko on·ani a·selsa rorirang Nokma A·kingrango nape, a·arangko ra·sekna, mal-gamrangko nosto ka·na aro cha·ue ra·na cholko man·emga ine parakangenba, mikkangchi Nokmarang, songni manderang NGO-rang apsan nangrime kamranglo ka·angna Joint Action Committee ku·monganiko on·angaha.