Shillong, Oct 13, 2025: Meghalaya a·doko bobil dake chakatgipa dolrang ong·kattaina sienga ine aganani bidingo a·dokni Skotong Minister Conrad K Sangma-ni jegalanina, Opposition dolni dilgipa Dr Mukul M. Sangma mikrakataniko on·atskaaha.

Bobil dake chakatgipa dolrangko bikottaiani bidingo Intelligence-rangoni maming u·iataniko man·sokuja ine Skotong Minister-ni agananiko jegalatenba, a·doko kenchakna nanganirang dongani gimin, iani bidingo Media aro official gadangoba a·dokni dilgiparangna mikkraksamsoaniko on·ahachim, ine Dr Mukul Sangma aganaha.

A·dokni dingtang dingtang biaprango maini gimin ong·enga, uarangko sandirokani kamde Skotong Minister aro sorkarini kamsa ong·a ineba Dr Sangma aganaha. Indake a·songo naljokani kamrangko report-rangosan pangchake dongna nangja ine janapatenba, a·doko mai ong·enga ukode chinrango pangchake am·sandina nanggen ineba Dr Sangma aganaha.

Uandakgipa chinrangko nikja dake donganiara an·tangtang daito-oni jokna jotton ka·aniko mesokani ong·enga ine Opposition dolni dilgipa aganaha.
Koela bikotani aro dingtang dingtang ong·gija kamrangko a·dok sorkari, pangnan jegalronga indiba kakketko manderang pangnan nikenga ineba Dr Sangma aganaha.

Dr Sangma-ni aganani gitade, niam gri koela badingani aro gipin ong·gija kamrangchi bobil dake chakatgipa manderangna tangka paisarangko dakchake on·na man·aia ine ua changni chang mikkrakataniko on·ahachim.

“Iandake ong·gija kamrangchi tangka paisarangko kamaianiara, a·dokni aro a·songni tom·tomanina kenchakna nangani ong·a,” ine Dr Sangma aganaha.

A·doko bobil dake chakataniko ong·katatna on·enggipa pilak cholrangkon sandie, champengchina Opposition dolni dilgipa, a·dok sorkariko didiataha.