@ghdnews.in@

Tura, Feb 12, 2026: Re·anggipa January 9 tariko rorirangni so·otako man·e sianggipa, Dilseng M.Sangma-na ta·rake kakket bichalko on·china dabie, knal February 13 tariko, A·chik a·songni nangrimgimin NGO-rang dal·begipa tom·bimonganiko Tura-o ong·atenga. Uni gimin, A·chik a·songo songdongenggipa manderang sakantian re·bae bak ra·epachina Nangrimgimin A·chik Dol (NAD) ba Unified Garo Organisation (UGO) mol·molataha.

Iani bidingo, NAD-ni dilgiparang dingtang dingtang songrangona aro bajar antidamrangona re·roroe manderang baksa ku·mongrimaniko ba u·iataniko on·engon, West Garo Hills a·jao donggipa Kerapara antionaba re·ange ku·monganiko on·angaha. Indake ia tom·anio, A·chik National Youth Organisation (ANYO)-ni Chairman Jasrang D. Shira, indake aganaha, “A·chik jat ku·mong nangrimna nangenga, gipin jat gita ong·nade knalo A·chik dedrangko gipin jatming ripeng dake brangatnabe, hai an·ching A·chik jat sakantian ku·monganiko on·na” ine ku·mongangaha.

NAD-ni dakchakgipa Padot ba Vice-President aro GSMC-ni Acting Chairman, Te Balkarin Ch. Marak-ba tom·anio dongpae, “Achik a·songni pilak neng·nikanrangiko chel·chakna sal sokaha. Sonaram R. Sangma skangipa A·chik manderangna kakket ramako, bilko chu·sokatna jako ra·dilchengipa ong·a. Dol chanja, indiba jatkosa mikkango done, ja·ku ga·dilgipa saksa ong·a. Pa Emonsing M. Sangma saksa kingkot ong·e, Parliament-o A·chik jatko dingtang ma·ate ripingna katipna aganchengipa ong·a.
GHADC da·o bilsi 73 ong·oba, rasong mikkim gribee be·gruaha, indiba A·chik sakanti mikkasale ripingna ku·monganiko nangenga” ine talatangskaha.

Meghalaya State ba a·doko jeon State Reservation dongachim, da·alo 23℅ kosan bilsi 53-o man·enga. A·chik a·songni Saliramchi A·chik A·kingrang gimangroroenga. Songrango dakgrikoba amchakjae, wate on·ana agre maming dakchakaniko man·jaenga ine pangnan aganronga. Uni gimin Sixth Schedule inon, Tribal Garo-kosa miksonga. Brine janggi tangna nangnikode, A·chik a·songko onchepgipa mande, gipin biapo songdongechina, GHADC-ko Tribal chanjaode, gipin jatna chol on·ode Bihar, UP, W.Bengal aro Maharasthra a·dokchi re·ange election-o susachina ine GSMC-ni Chairman Backing A. Sangma aganangskaha

Indake, gipin jatna chakgipa manderangko dal·e ra·na nangja, an·ching A·chik sakanti ku·mongani sal sokaha, ong·jaode, Garo Hills ba A·chik a·songde damgipin Tripura ong·gen. Uni gimin A·chik ma·gipa pagiparang dedrangko knal sotnio name janggi tangchina ba·at-chi·atenga, man·rikgni dedrang su·drangsa ong·angskagen. Hai A·chik a·songni manderang A·chikrang mikkrake re·mikangna aro A·chik jatko tangkamatna sakantian jak on·na, ineba Sangma ku·mongataha.