@ghdnews.in@

Tura, Feb 10, 2026: All A·chik Youth Federation (AAYF), Central Unit, re8baenggipa GHADC election-o tribal ong·gijagipa candidate-rangko susana on·gija, election-o tribal ong·gijagipa manderangni vote on·aniko champengatchina dabiangaha.

GHADC-na on·gimin Sixth Sheduled, Indian Constitution-ni Article 244 (2)-ni ning·o tribal manderangni bil aro dakbewal rikbewalrangko naljoke rakkina dingtangmancha, 1952 bilsio a·bachengataha ine AAYF parakataha.

Uni gisepon, tribal ong·gijagipa manderangko GHADC election-o bakko ra·na on·aniara, A·chik jatni dakbewal rikbewalrang aro A·chik jatni bilko bilgriata ineba u·iataha.

GHADC-ko, A·chik manderangnasan on·aha, uni gimin, District Election Officer aro Returning Officer, maming dakeba tribal ong·gijagipa candidate-rangni nomination file ka·aniko ra·chakjachina aro tribal ong·gijagipa manderangna voter slip-rangko on·jachina gitaba didiataha.

Indake ong·engon, non-tribal chong·motan tribal ong·gijagipa manderangni Meghalaya Assembly election aro Parliamentary election-rango susana aro vote on·na ukode, jegalja, indiba GHADC-de A·chik jatna dingtangmancha on·gimin bil ba niam bidik ong·a, uni giminsa gipin jatrangko GHADC election-o susana aro vote on·na gita man·chongmotaja ine AAYF parakataha.

Uni gisepon, je political dolba gipin jatrangna party ticket on·e, GHADC election-o susaatgenchimode aro vote pu·onna on·genchimode, Garo Hills gimikni NGO-rang aro songdongenggipa manderang baksa apsan ku·monge, rakbatgipa ja·kurangko de·anggen aro jingjengatanirangko dakanggen, ine AAYF pilak political dolrangna mikkrakataniko on·ataha.