Tura, Nov 27, 2024: Tura-o skanggipa changna ‘Sky Cycling’-ko Butbar salo GHADC-ni Deputy CEM Nikman Ch.Marak, Tura Burny Hill-o donggipa, Tree House-o oprake on·angaha.
GHADC-ni Deputy CEM Nikman Marak, baksa ia tom·anio Hundred Drums Wangala Festival Committee-ni Chairman Ronald Rikman Ch.Sangma, Tura Baptist Mondolini Assistant Pamong Sachin Akim B.Sangma, SBI-ni Regional Manager, DIPR-ni Assistant Director FK Marak aro gipinrang dongpae bako ra·angaha.
Nikman Marak mongsonggipa sokgipa ong·e, jinmana aganprakangengon, ia Sky Cycling-ko Tura-ona ra·baniara namen kusi ong·beani ong·a. Ia Sky Cycling-ara Tura-ni manderangsan ong·aigija, gipin biaprangoni re·bagipa manderang indakgipa Sky ycling-ko nike kusi ong·gen aro uamang Tura-ni an·sengani, nitoaniko cha·tote nina gita man·gen. Uni gimin, an·tangtangko arate dongaigija, indakgipa Sky Cycling-ko sale an·tangtangni ka·donganiko ma·sina gita man·gen. Ian Meghalaya a·doko skanggipa aro Salgro Salaram a·doko gnigipa Sky Cycling ong·enga ine aganangaha.
Ua (Nikman) an·tangan Tree House-o a·bachengatgipa Sky Cycling-ko skanggipa sale mesokangaha. “Anga a·bachengode kenachim, maina angni salangmitting somoio cycle chain loose ong·e, neng·taka gita dakachim, indiba ja·mano re·angpila” ine ua aganaha.
“Anga dingtangmancha, Tree House-ni nokgipa Ronald Rikman Sangma-ko uni gisik nangbee, Tura-ona indakgipa kal·aniko ra·bae, manderangna namgipa cholko on·anina mittela. Mikkangchi uni pilak miksonganirango aro dingtang dingtang kamrango chu·sokgipa ong·china, angni nama sikaniko on·na sika” ine ua aganaha.
Je manderangan ia Sky Cycling-ko sale nina sikengachim, Burny Hill, Tree House-ona re·ange bangbango budu dingsako Cycle salna man·gen. Indiba ia Sky Cycling-ko salna gita ticket kingprako tangka 590-ko gamesa salna man·gen ine ia Sky Cycling nokgipa parakataha.
Iasan ong·aigija, ka·mao Zip lining, Rock Climbing aro nokningo kal·anirang donga, uarangkoba kal·na gita man·gen ineba parakataha.
Ia Sky Cycling-ko oprakna gita dingtangmancha November 27 tarikko manchie donaniara, Tree House-ko chalaienggipa nokgipa Ronald Rikman Sangma-ni jikgipa Jyoti Tasha Marak-ni atchiani salko gisik ra·na gita November 27 tarikko tik ka·e donaha ine aganaha.
