@ghdnrws.in@

SHILLONG, FEB 7, 2026: East Jaintia Hills-ni koela a·kolo bilakbee gopretanio sianggipa sak 2 manderangni manggisirangko Sukrobar salo man·dapaha aro da·odipet sigiparangni manggisirangko man·a gimik sak 27 gapaha. Ua ong·a obosta, February 5 tarik Bristibar salni 11:30 bajimango Umsngsat songo niamgri koela bikotenggipa Thangsku minggipa biapo ong·aha.

Ua gopretgipa a·damoniko State Disaster Response Team (SDRF), Special Rescue Team (SRT) aro National Disaster Response Force (NDRF) dolrang baksa dingtang dingtang agency-rang apsan nangrime naljokatanirangko dakengkua.

Meghalaya a·dokni Director General of Pulis (DGP) Ma I.Nongrang, da·odipet sak 27 man·gipa manggisirangoni sak 12-kode u·ina man·aha, dongkuenggipa manggisirangko man·a dipet ta·rake u·ina man·na gita kamrangko ka·enga ine parakataha.

Unbaksana, Medical Team aro Ambulance-rang dakchakaniko on·na a·damo dongenga aro nanggitikan somoio dakchakaniko on·na gita Army aro Air Force-rangba tarie dongenga. Ia ong·a obostako, District Official-rang aro State Disaster Management Authority name nirokaniko dakenga, ineba parakataha.