@ghdnews.in@

AMPATI, FEB 7, 2026: Meghalaya a·dokni sima ario songdongenggipa manderangna nambata sanna bannaniko on·na miksonganio a·dokni Skotong Minister Conrad K.Sangma, Sonibar salo palang ge 10 gnanggipa Integrated AYUSH Hospital-na pangchakaniko South West Garo Hills a·jani Merenggipara-o songe on·angaha.

Ia pangchakaniko songe on·angani somoio Mahendraganj Constituency-ni MLA Sanjay A. Sangma, Salmanpara-ni MLA Ian Bontham M Sangma aro gipin official-rang dongpae bak ra·angaha.

Ia hospital-ko National AYUSH Mission-ni ning·o rikna sienggipa gong kror 7-ni project ong·a. Ia hospital-o AYUSH Doctor, Nurse aro Yoga Instructor-rangko man·chape, ge 35 post-rangna kamrangko nakatatgen.
Ian a·jao dal·begipa chu·sokani ong·gen aro a·jani ning·tugipa songrango aro sima arijolrango songdongenggipa manderangna nambata sanna bannaniko on·na ja·ku de·ani ong·a. Da·alo saa ding·aniko porikka ka·e niani mangmangsan dongachim, indiba mikkangchi ia hospital-o donkame sanna bannaniko on·na man·gnok ine Skotong Minister aganangaha.

Iano, jatni jakkalrongbaenggipa A·chik samrangko jakkale, je saanikoba sanna banna man·gen aro chadamberangna an·seng baljokaniko on·anio ia hospital mongsonggipa bak ong·gen ineba ua aganaha.

Sima ario songdongenggipa manderangni re·a doanio neng·nikaniko man·enggipa rama sorokrangba a·dok aro ma·mong sorkarini ning·o on·enggipa Scheme-rangchi namdapatna man·aha ine Sangma aganangaha.

Unbakana, sima arini gate-rangko chipani a·sel attamni somoio re·ruraanirang namen neng·nikaniko man·engani gimin re·ruraaniko nengrabatatna gita bypass ramana proposal-ko on·aha aro somoi soko biapko Survey ka·gen ineba Sangma agandapangaha.

Lekka pora skianiko ua jolo gitalgipa Science and Commerce College-ko chalaina a·bachengaha aro lekka poraniko skichakram nokdringrangko namdapatna sorkarini skanggipa mikkango done kam ka·aniko mesoka.

Bangladesh baksa ong·enggipa obostarangko niatpilengon, sima ario songdongenggipa manderangko mikkrake dongchina aro chubata gadangni bil gnanggiparang baksa bakrime tom·tomaniko aro naljokaniko rakkichina Skotong Minister didiangaha.

Uarangna agreba, badingchiwalani bidingo janapangengon, Awang Chips aro Nokma Icecream gita, an·tangtangni changa sapaniko jakkale, janggi tangani cholrangko dakna man·a ine ua aganaha.

Deputy Commissioner Anendya Raajsshre-ba ia project-ni bidingo aganangengon, AYUSH-ni ning·o ia a·jao donggipa manderangna kraa bewalo pilakni gita sanna bannaniko on·na ka·dongsoenga ine aganaha.

SDMHO Dr. Lydia Marak, a·jao man·enggipa sabisirangko sanna bannanikosa on·aigija an·seng baljokani gimin u·iatanikoba ia hospital on·gen ine aganangskaha.