@ghdnews.in@

Shillong, Feb 6, 2026: Bristibar pringo, East Jaintia Hills a·jani Thangsko jolo donggipa Mynsyngat songni koela a·damo rang·san gopretanichi, koela a·damo kam ka·enggiparang komibeoba sak 18 manderang siaha ine kobor man·aha.

Ua a·sel ong·gipa biaponiko da·o dipet sak 18 manderangni manggisiko man·aha aro kam ka·giparangoni saksade saknaako man·aha ine East Jaintia Hills a·jani Superintendent of Pulis (SP) Vikash Kumar parakataha.

“Da·o dipet sak 18 manderangni manggisiko man·aha aro saksade saknaako man·ahani gimin uko Sutnga PHC-oniko ja·mano Shillong-ona ra·angaha,” ine Kumar u·iataha.A·sel ong·gipa biapo pulisrangko dakchakaniko on·na gita National Disaster Response Force (NDRF) aro State Disaster Response Force (SDRF)-ni sipairangko okamataha ineba SP parakataha.

Ua koela a·damo niam gri koelarangko bikotengani a·sel gopretanio, bang·bea manderang sina nangaha ine chanchichipenga.ua a·selni bidingo sandirokna a·bachengataha ineba Kumar parakataha.

Indake ong·engon, ua a·sel ong·anina a·dokni Skotong Minister Conrad K Sangma, suk ong·gijaniko parakatenba, ia a·sel ong·anio sianggipa mande sakprakni nokdangrangna gong lak 3-ko ex-gratia on·gen ine parakataha.

Uandake, a·sel ong·anio sianggipa manderangni nokdangrangna Skotong Minister kalimpaaniko parakatenba, ua a·selni bidingo sandirokna gita ge·etaniko on·ataha.

Batanggimin somoirangoba East Jaintia Hills a·jani dingtang dingtang koela a·damrango, gopretgipa dynamite-rangko jakkale koelarangko bikotani a·sel, kam ka·enggipa manderang bang·en sina gita nangaha.