@ghdnews.in@

Williamnagar, Feb 6, 2026:: Meghalaya High Court-ni ge·etanio pangchake Garo Hills Autonomous District Council (GHADC)-o Executive aro Judiciary-ko dingtanggrikatna ja·ku de·ahani gimin, Williamnagar Bar Association (WBA), mittelpilaniko parakatenba, GHADC-ni District Judge-ko seokanio parake dakchina didiatskaaha.

WBA-ni parakatani gitade, GHADC-ni District Judge-ko seokanio Garo Hills gimikonikon dorgastorangko okamna nanga, indiba a·ja damsamangmangnasan u·iataniko on·aniara niamni a·palo ong·a aro mikkangchi Garo Hills-na namgija bimingko ra·baani ong·enga.

“District Council Judge-ni kamara namen mikkim gnanggipa ‘Public Office’ ba kam ong·a aro iandakgipa kamrangna seokanio pangnan jinmani nikrangrao niam gita ong·na nanga. Judiciary-ni jakgitel ong·aniara niam bidikni mongsonggipa bak ong·a aro District Council-ni kachario maming mikkang niteani gri ong·atna gitade, dilgipako seokanio biming mingmangmangaigija, kamna kragipakosa seokna nanga,” ine WBA-ni dilgiparang parakataha.

An·tangtangni daitorango, parak ong·ani, kakket ong·ani aro on·kangani donggenchimosa GHADC-de Sixth Schedule-ni ning·o orto dongbatgipa ong·gen. GHADC-ni District Judge-ko seokengon, Garo Hills-o songdongkamgipa A·chik mandeko seokchina, Recognised ong·gipa University-oni Law Degree donggipa ong·china, komibeoba bilsisnina kacharirango Ukilni kamko ka·gimin ong·china aro bilsi 35-na bate bilsi 48 batgipa ong·jachina WBA didiataha.