@ghdnews.in@

Tura, Feb 6, 2026:Adita salrangna skang, Assam a·,dokni Goalpara a·jao donggipa Paikan dollong sambao ma·sina man·gijagipa manderang Tura-oni Guwahati-ona songreangenggipa gari bolsako chadrape ro·ong goanio jak donggipa manderangko ta·rake am·sandienba rim·china, Garo Hills Autonomous District Council (GHADC)-ni Deputy CEM Nikman Ch.Marak, Assam a·dokni Skotong Minister Himanta Biswa Sarma-na sedoataha.

Ia a·sel ba obosta ong·aniara, kam nangani gimin songregipa manderangko salangenggipa gariko ro·ong goanichi garini mikkango gadogipa A·chikrang adita saknaanirangko man·tokaaha, ine janapatenba, ian Assam a·dokni dingtang dingtang biaprango poraina, sanna bannaniko ra·na, kam nanganina salanti Paikan gita re·ruraenggipa A·chik manderangna namen kenbeani ong·enga ine Deputy CEM-ni seatgipa chittio janapataha.

Indake ong·engon, Scheduled Tribe manderangni kosako ong·gija dake ramarango chadrapaniko jegalatenba, A·chikrang baksa tom·tom donganiko kajia ong·atna jotton ka·arangko naljokatna Marak didiataha.

Deputy CEM-ni didiatani gitade, India a·song-ni dongimin niamo pangchake, Paikan ramao A·chikrangni songreako chadrapanio jak donggipa manderangko ta·raken rim·china aro Paikan jolo chu·onga gita chel·chakgipa pulis dolrangko donchina, A·chik-rangni kosako iandakgipa a·selrang ong·taijachina, mikkangchi nirok simsakaniko dakenba, Assam-ona songregipa A·chikrangna naljokaniko on·china, Goalpara a·jani District Administration aro pulis department-na ge·etaniko on·china, Deputy CEM, Assam-ni Skotong Minister-ko mol·molataha.