@ghdnews.in@

Tura, Jan 29, 2026 West Garo Hills, District Administration, Meghalaya a·dok ge·sa mongsonggipa biap Wadagokgre (Bhaitbari)-ni Archaeological site ba skang chasongoni ripinge dongipa biapo niamgri a·a cho·ani aro songdong a·chadranirangko champengatna, Bharatiya Nagarik Suraksha Sanhita (BNSS)-ni Section 163-ni ning·o adita champengatanirangko dakataha.

District Magistrate Vibhor Agarwal, machine-rangko jakkale niamgri a·a cho·anichi skang chengoni ripinge donbaenggipa Buddhist-rangni bi·chakgipa nok aro uni pakmarangko nosto ong·atengaha ine koborrangko man·soani jaman ia champengataniko on·ataha.

Official-rangni aganani gitade, ia nosto ong·ahaode, taripiltaina man·jawahani gimin, skangni ripinge donbaenggipa ia biapna kenchakani ong·enga aro naljoke rakkina ga·akenga.

Ia km 15 mang bakrogipa Wadagokgre biapara, Meghalaya-ni ra·gatgimin gita Assam Ancient Monuments and Records Act, 1959-ni ning·o naljoke rakkibaenggipa mongsonggipa biap ong·a. Ia pakmarang metre 4 mangni ning·o donggipa biaprango a·a cho·ani, nok rikaniko raken champengatgimin ong·a.

District Administration, ia biapni wilwilao donggipa biaprang jekai Rajpur, Gandhipara, Balujhora, Nayagaon, Belbari aro Timminu-rango niamgri songdong a·chaenggiparangni bidingo janapatengon, ian Meghalaya Land Transfer Act, 1971 aro District Council-ni niamrangko pe·ani ong·a ineba u·iataha.

Ia niamni kosako re·badeani kamrangara niam reitirangko rakkianio neng·nikanirangko ra·banaba donga ine official-rang mikrakataniko on·atenba nangchongmotgipa obostarangni a·sel champengatanirangko ta·raken ra·gatataha aro minggipin ge·etaniko man·taikuja dipet ia champengatanirangko dakangkugen ineba u·iataha.