@ghdnews.in@

Shillong, Jan 27, 2026: Meghalaya Pradesh Youth Congress Committee (MPYCC), ia VB-G RAM G Act, 2025 (Vishik Bharat-Gaurantee for Rozgar and Ajeevika Mission (Gramin) Act, 2025)-ko BJP sorkarini ra·baaniko jegalatenba, ia VB-G RAM G Act, 2025-ara MGNREGA (Mahatma Gandhi National Rural Employment Gaurantee Act)-ko ra·galskana miksonganisa ong·a, ine parakataha.

BJP sorkarini VB-G RAM G Act, 2025-ko ra·baskaniara MGNREGA-ko namdapatna miksonganirang dongja, indiba cholgrigipa nokdangrangna kamko ka·e cha·na on·gimin bilko, uamangna nambate janggi tangna on·gimin cholko aro uamangni mipalko ra·sekna jotton ka·anisan ong·aia.

India-o songdongipa cholgri manderang nokdangtangtangko ia MGNREGA-ni ning·o kamrangko ka·e aldua bilsi kolgrik mangni gita ong·engaha.

MGNREGA-de India sorkarini dingtangmancha indin ka·saae on·gipa boksis ong·ja (Charity), indiba cholgrigipa aro songadamo songdongiparangna kamko ka·e cha·na a·songni niamo pangchake on·gimin billsa ong·a.

India a·song gimiko lak ritcha mangni gita MGNREGA-ni ning·o kamko ka·e cha·gipa nokdangrang donga aro an·ching Meghalaya a·dokoba noking haljalrangni gita donga. la MGNREGA-ni ning·o kamrangko ka·anichi cholgrigipa nokdangrangba game ge·e cha·na a·a chi dongpagijagiparangba songo donge tom·tome jangi tangpana gita man·achim. Akal Karap ong·ani somoirango aro balwa mikka rakani a·sel ge·a gamanio biterang namgijani somoio, ia MGNREGA-an manderangko gipin biaprangchi re·jojoe, janggi tangani cholrangko sandina nangatgija, songtangon tom·tome dongna gita bilsi kolgrikmang dakchakaha.

MGNREGA-ni ning·o kamko ka·e cha·giparangoni sotdok percent (60%) mangni gitade me·chikrangan ong·a. Songo dongipa me·chikrang noktangtangko wate gipin songrangchi kamrangko sandina gita ong·katanirang ba MGNREGA-ni ning·o kamko ka·ani a·selan komiaha. Indioba da·alo BJP sorkari VB-G RAM G Act, 2025-ko ra·banichi songo dongipa me·chikrangni ge·samangmang dongpagipa janggi tangani mikim rasong aro cholko ra·seke katna gita niamrangko tariaha, ine MPYCC matnangataha.

BJP sorkari MGNREGA-ko bilgriatna gita kamrangko ka·ani adita bilsirangna skangan tangka paisarangko chu·ongija chamanirangko a·bachengbaha. Jedake bilsi 2021-20220 ₹7,30,00,00,00,000 (kror hajal sotsni gitam) tangkarangkosan chamataiaha, indiba chamatna nanganide 9,80,00,00,00,000 (kror hajal sotsku chet) tangkarangkosa nangachim.

Indiba bilsi 2022-23 0₹7,30,00,00,00,000 (kror hajal sotsni gitam) tangkarangkosan chamataiaha, indiba nanganide₹ 8,90,00,00,00,000 (kror hajal sotchet sku) rangko nangachim.

Apsan daken bilsi 2023-24-o ₹6,00,00,00,00,000 (kror hajal sotdok)-de namen komibataha, indiba jamano chu·ongjae hala ka·e, bidaposa on·dapaha.

Tangka paisarangko ja·manchake watate kam ka·gipani hajirarangko ru·utata, indake manderang hajirako man·ningjani gimin ka·onange sorkariko hala ka·na a·bachengtokaha. Indake MGNREGA-na chamatgija tangka paisarangko sruksruk ra·e kataha aro ua tangkarangko niamo pangchake ra·na ine VB-G RAM G Act, 2025-ko ra·baskaha.

VB-G RAM G Act, ian MGNREGA-ni gita jedakgipa bewalo manderangna kam ka·e cha·na cholko on·achim, uaming namen dingtangrikjok. la VB-G RAM G Act-ode, kam ka·ani cholkon manderangni jako on·jakok, indiba ma·mong sorkarini namnike, tangkarangko chu·onga gita on·atja aro officer-rangni gita simsake kamrangko ka·anirango aro Technology-rangni name kam ka·ajani gimin pangchakbataignok.

MGNREGA aro VB-G RAM G Act-ni dingtangrikani mongsongbatgipa mingbri donga.

Centre-ni notification-ode, ma·mong sorkarini gita basegimin a·dokrangonasan notification-ko sokatgen aro ua a·dokrangonasan tangkarangko sanction ka·atgen, indake bang·bata a·dokrangkon, uno watchanganganirangko altuen man·gen, mingsongbate je a·dok sorkarirangan, ma·mong sorkariming mamingba bak dongpagijagiparangde.

Indiba MGNREGA-ni niamde, India-ni gimik a·jarango dongipa songadam jol gimikon watchangija kamrangko ka·e cha·na gita cholrangko on·a. Indiba VB G RAM G Act-ode, tangkarangko watchanganirang bang·en dongen.

Fixed Budget Allocations-o jeje a·dokrangona ma·mong sorkari tangkarangko watata, ua a·dokosan kamrangko kana gita man·aigen, ine MPYCC talataha.

MGNREGA-ni niamode baita manderang kamko dabia inditan tangka paisarangkoba
sanction ka·achim, indiba VB-G RAM G Act-ni niamode ma·mong sorkari nigrike a·dokna tangkarangko chamatgen aro ua tangka chu·ongjaha ong·ode a·dok sorkarisa uko gamdona gita nangnok.

Ma·mong sorkarioni watatgipa tangkarang chu·ongja ong·ode, a·doko kamrangko dongtongatanirang ong·gen.

MGNREGA-ni niamode manderangni kam ka·ani krisasa tangkarangko man·dapani dongachim, indiba VB-G RAM G Act-ni niamode tangka donga dongijako nigrikesa kamrangko a·bachengatna gita man·aignok.

Increase Financial burden on state, MGNREGA-ni niamode ma·mong sorkarisa chu·gimik kam ka·ani korosrangko jako ra·achim, indiba VB-G RAM G Act-ni niamode kamrang matchotna man·jaoba a·dok sorkarisa korosrangko on·dapna gita nangnok.

lan Meghalaya gita chonbegipa aro kangalgipa a·dokrangna namen neng·nikatanirangko mikkangchi ra·bachongmotgen, jedake kam ka·ani salde komia, hajira man·aniba komia aro hajira man·aniba ru·uta.

Strict Administrative and Technological Controls, VB-G RAM G Act-ni niamode, technology-ni kamrangko apalbatataha jedake kam ka·na re·bagipa manderang gimikan biomatric attendance, mobile apps, Aadhar-linked systems aro kam ka·ani somoimanchako chananiba nirokanirang technology-rangko jakkala.

Technology-ni kamrangko jakkale corruption-rangko champengna miksonganirang dongoba, uchin bang·a neng·nikbatatanirangko man·skagen, jedake mobile dongpagijagiparangde kamko ka·na man·oba attendence-ko on·ena man·jawa ba network namjani a·selba on·ena man·jawa.

Kam ka·gipani hajirakoba biomatric aro banking system namjani a·selrang payment sokjawa.

Technology-rangko bang·bate jakkalanichi corruption-ko champengna man·naba donga, indiba Technology-ko apalbate jakkalani a·selan mobile phone-ba gipin Technology-rangko jakkalna changjani a·sel kamrango watchanganganirangko man·skanaba donga.

larangni a·selan songo dongipa manderangna bang·a neng·nikarang sokbani dongskagen, jedake me·chikrangni janggi tanganirang neng·nikatanirangko man·batgen.

A·palchi ong·kate kam ka·anirang batrorogen, skul bi·sarang dropout ong·anirang batrorogen, ineba MPYCC mikkrakataniko on·ataha.

MGNREGA-ko songo dongipa manderangna janggi tangna man·na gita niamko tariaha, indiba VB-G RAM G Act-ko songni manderangna chamatgipa tangkarangko komiatna ba ra·seke katna man·na gita niamrangko tariskaha.

MGNREGA-ko 2005 bilsio Congress sorkari India-ni ge 200 a·jarangko namdapatna miksonge niamrangko tariachim, indiba 2008 bilsio uko India gimiko kam ka·na man·na gita niamrangko apalbatate taritaiaha aro NREGA-ko gale MGNREGA ine mingjitskae, India gimiko Father of the Nation Mahatma Gandhi-ko gisik ra·na aro uko mande ra·na aro Mahatma Gandhi-ni miksonga gita, ia India-o songdonggipa cholgri manderangna dakchakna miksonge MGNREG-ko ra·baskaha.

Indiba da·alo BJP sorkari ia MGNREGA-ko ra·galskaenga aro Mahatma Gandhi-ni bimngko gimatna chanchienga aro manderang a·songni niamo ka·donganiko aro pangchakaniko rang·san gimatatenga.

Meghalaya Pradesh Youth Congress-ni da·alo MGNREGA-ni gita raken ku·rangko on·atenga aro Meghalaya-o songdongipa manderangni kosako sinjetanirangko chel·chakna gita ia VB-G RAM G Act-ni kosako jegalataniko on·atenga.

MPYCC-ni dabiarangara, MGNREGA-ni ning·o dongimin niamrangko ja·rikbo aro India gimikon ia niamko ja·rikbo.

Tangka paisarangko MGNREGA-ni somoio jedake fund ka·achim, ua apsankon ja·rike kamko ka·angchina didiataha.

Tangka paisarangko somoini kri ja·rike fund-rangko ka·china jedakode, kam ka·giparang somoi gita hajirako man·gen.

Block office-o aro songko dilgiparangni bimchipe kam ka·anirangko mande ra·pachina, VB-G RAM G Act-ko ra·gale MGNREGA-ko ja·rikangkuchina, MPYCC ma·mong sorkariko didiataha.