@ghdnews.in@

Resubelpara, Jan 25, 2026:Re·anggipa January 9 tariko Rajabala Goalgaon songo ACHIK Organisation-ni member Dilseng M.Sangma-ko rorirangni ka·saninggija chadrape so·otaniko Rongrong elakkao NCP-ni Candidate ong·e susana sienggipa, Sengmatchi Sangma jegalatenba, iandake A·chik a·songo songdong a·chae, A·chik jatni janggiko nisie galgipa rorirangni kosako rakgipa ja·kuko de·china didiataha.

Iani bidingo koborko on·atani gitade, rorirangni niamgri ro·ong bikottaniko ACHIK Organisation-ni dilgiparang champengna gita re·ange, re·bapilengmitting somoio, A·chik chadambe saksa Dilseng M Sangma janggitangko gimaatna nangaha, ine Sengmatchi Sangma parakataha.

District Council-ni a·arango rorirangni niamgri ro·ong bikotaniara niamni a·palo ong·enga, iandakgipa kamrangko champengna gita, skanggipa Garo Hills Autonomous District Council (GHADC)-nm ni daito ong·achim. Indiba Maini gimin iandake niamgri bikotenggipa ro·ong quarry-ko maina champengjaha, ine sing·dona nangani ong·enga, ine Sangma parakataha.

A·chik a·songo songdong a·chaenggipa A·chik jatko so·otna ka·donganiara, ian Bangladeshi-oni katnapbae, Garo Hills-ko “MIYALAND” a·dok dakna miksongani ong·enga, ine Sangma janapatenba, mikkangchi namgijagipa a·sel Gari Hills-o ong·taijana gita sima ariko name nirokatchina, Sengmatchi Sangma a·dok sorkariko didiataha.

Garo Hills-o niamgri songdonggipa gipin jatrang batrikrikengon, A·chik jatko chikpangpile, an·chi ringaniko nikna man·ahani gimin uamangni kosako rakgipa ja·kuko de·na nangchongmotenga aro A·chik jat apsan ku·mongna gita nangenga, ine janapatenba, District Council-ni dilgiparang niamgri Garo Hills-ona napdrae rorirangni ro·ong bikottaniko ta·raken champengatna nanga ineba Sangma didiataha.

Matgrik Dilseng Sangma an·tangni janggiko gimaatanira dilgiparangni niamgri chalaienggipa ro·ong Quarry-rangko nirokjani a·selsa ong·aha ine janapatenba GHADC, Dilseng Sangma-ni nokdangna lak 50 aro a·dok sorkari lak 50 Ex-Gratia-ko gamna nanga, ine Sangma a·dok sorkario dabiangaha.

Gipin jatrang Garo Hills-o songdonge, Garo Hills-ni dingtang dingtang biaprango bading chiwale cha·enba A·chik jatko sinjetenggipa gipin jatrangko, GHADC election-o susana on·na nangja ine janapatenba, pilak Political party-rangan gipin jatna party ticket-ko on·na nangja aro uamangni GHADC election-o bak ra·aniko A·chik jat sakantian jegalna nanga. Maina GHADC-de A·chik jatna on·gimin Sixth Schedule-ni bilsa ong·a. Non-Tribal-rang maming saloba bak ra·na kraja. Uni gimin, uamangni election-o susana miksonganiko raken jegalgrimna nanga ine Sangma didiataha.