Tura, Sept 23, 2025: A·dok sorkari A·chik National Volunteers Council (ANVC) aro ANVC-B dolrang baksa a·dok aro ma·mong sorkarini 2014 bilsio soi ka·grikgipa ‘Garo Accord’-ko ‘miksongmanchaen’ bon·chipatengani a·sel, Garo Hills Autonomous District Council (GHADC)-ko chalaianio tangka paisana neng·nikanirangko chagrongna nangenga ine Tura-ni MDC aro BJP-ni State Vice President Bernard N Marak matnangataha.

Marak-ni parakatani gitade, Garo Accord-ni Paragraph 12.1-ni ning·o Monitoring Committee-ni tom·aniko a·dok sorkari ong·atjaskal aro Paragraph 7.7-ni ning·o State Finance Committee-ko songkujaskal GHADC-na bi·atgipa gong kror 664 tangkarangko ma·mong sorkari watatjawa.
ANVC dol baksa songgigrikgipa niamrangko chu·sokatna a·dok sorkari gisik nangjaengani a·sel GHADC-o ong·enggipa obostarang namjabatroroengaha.

Home Affairs Ministry-ni Secretary Dr Vijay Kumar-ni seatgipa chittio janapatenggipa gong kror 664-ni proposal-ko ma·mong sorkarina on·ataha aro iako Ashahel D Shira, Council-ni Revenue Committee tom·anio, Garo Accord-o soi ka·giparangna mesoke on·aha ine Tura MDC parakataha.

Ia kamrangko Garo Accord-o soi ka·giparang name nirikkienga ine janapatenba, State Finance Committee-ko songchenggijade ia tangkarangko ma·mong sorkari watatna man·jawa, maina a·dokni Finance Committee gride Garo Accord-ni Paragraph 7.6-ko pe·ani ong·gen ine Marak parakataha.

“Ia songgigrikaniko a·dok sorkari chol ra·na nangja. Garo Accord-ko chu·sokatanio a·dok sorkari gisik nangbebea ong·ode, chinga dakchakanirangko on·na kusi ong·aigen” ine Marak janapatenba, batanggimin bilsi 11-na MDA sorkari, ia kamko ru·utatchae dongenga, indiba namgnikode ra·skaenga ine matnangataha.

Ma·mong sorkarioniko bi·atenggipa gong kror 664-oni gong kror 308-kode Forest & Environment-o nangchakegipa kamrangna chamaha ineba Marak parakataha.