@ghdnews.in@

Resubelpara, Jan 25, 2026: North Garo Hills-ni Dainadubi-o donggipa DMR Check Gate sambao mijal January 24 tarik, Sonibar attamo motor bike a·sel ong·anichi mande saksa an·tangni gamchatgipa janggiko gimaataha. Ia a·sel ong·aniara rama tarigipa contractor-rangni simsakgija kam ka·enba, maming mikkrakatani chinrangko donjani a·sel bang·a motor bike bolsa naptome a·sel ong·aha ine Niksamso Garo Community Organisation (NGCO) Dainadubi Regional Unit, parakataha.

North Garo Hills a·jao rama gital tarina gita a·arangko cho·engoba, badia ramao kengni dongachim, manderangko naljokatna maming mikkrakatani chinrangko a·a cho·gipa bipao donjaha ine NGCO Dainaduni Regional Unit matnangataha.

Indake simsakgija kam ka·enggipa contractor-rangni kosako rakgipa sastiko on·china NGCO dabiangenba, ramako re·ruraenggipa manderangna mikkrakatani chin ba signboard-ko done, naljokaniko rama tarigipa biaprango donchina gita contractor-ko didiataha.

Ia biapko name nirok simsakgija donaigenchimode, mikkangchi bang·a a·selrangko chagrongna nangaikugen ine parakatenba, ia biapo simsake garirangko salchina, mikkrakatani chinko donna nangchongmota. North Garo Hills-o ba gipin biaprango development-ni kamrangko ka·genchimoba, manderangni janggina simsakaniko dakna nanga, ineba NGCO Dainadubi Regional kam ka·enggipa company aro contractor-rangna mikkrakataniko on·ataha.