@ghdnews.in@

Tura, Jan 23, 2026: Batanggipa adita salrangna skang Goalgaon songo Dilseng Sangma-ko so·otani ja·man, adita ding·chaogrikanirang ong·katani a·sel, gipin jatrang Garo Hills-ni dingtang dingtang bajar antirangona me·su samjakrangko palana re·batokjaengani gimin, A·chik ma·giparang me·su samjakrangko palaskaengon, songdongenggipa manderang, me·surangni damko rakbate palenga ine matnangtokatani gimin, Bristibar salo kobor ra·timgiparang Tura bajarona re·ange sing·sandianiko dakon, dam rakbate palja, apsan damon paltokenga ine me·su palenggipa A·chik ma·giparang aganaha.

“Chinga da·osan ong·ja, ru·uta bilsirangonin Tura bajaro me·surangko pale sim·e cha·enga, chinga podina chamsako 40 breode 50 pala, sobok ronggittamko 30 breode, 40-san palaia, sikot rongbongako chinga pangnan 100 palronga, indiba sikotrangko bang·e man·ani simoide, 100-na rongdok ba rongsnirang on·a. Gominda rongsako 40 breode, 50 palna ga·aka, me·surangko man·a, man·jani krisa ong·aia, Indiba me·su bregipa manderang dam raka raka ine chingko manengronga aro me·su pale nok building rikna am·engama, ineba chingko intekronga. Chinga maming saloba me·su samjak pale nok building rikna man·ja, indiba nokdangko chalaina aro bi·sarangko skul poraiatna maming chol dongjani giminsa, chinga manderangni manenge, saie donangoba chakchike me·surangko pale cha·na ga·aka” ine A·chik ma·giparang aganaha.

Na·songara, gipin jatrangni Tura bajarona re·bae me·su palako namnikama namnikja, ine sing·on, “Chingade banggalrangni re·bae me·su palako namnikja, chinga A·chikrara pale sim·e cha·akosa namnika. Chinga da·o banggal dongjani gimin, me·surangko suk ong·bate palna man·enga. Chinga sam satgipa banggalrangni me·surangko palna nangnikja, man·a dipet A·chik songni me·surangkosa ra·bae palenga. Uni gimin mikkangchiba banggalrangko Garo Hills-ni dingtang dingtang biaprango palna on·na nangja” ine me·su palgiparang aganaha.

Indake ong·genchimoba, adita sak A·chikrang gipin jatrangna dokkanrangko on·enga, indake jatskani kosako re·giparangba dongaia. Uni gimin jat gimik apsan ku·monge, jatskaan pale sim·e cha·china cholko on·na nanga ineba me·su palgiparang dabiangtokaha.

Undake ong·engon, adita salrangna skang me·su palgiparangko check ka·na gita me·asa sakgni me·chik saksa, Tura bajarona re·bae, ma·gipa saksani me·su palako sing·eaha, rasin kg maidake pala abi ine sing·ana, kg-o 50 ka·e pala ine aganchakaha. Uni ja·mano me·su bregipa me·chik saksa rasin dam rake pala ine sakon aganjok, check ka·giparang re·bapile, abi nangko photo ka·na, inani gimin, “Angade chadenge on·jok, angko social media page-o gatatgen ine u·ija attamode, angni photo baksa rasin dam rake palenga, ine DC-ni page-o gatatjok, uko nike anga namen suk ong·jajok, anga 50-na batede paljachim, saobarang palakon, ukode angaba ma·sija, angkosa photo ka·e ra·angenba social media page-o kratcha·ataha. Sawamancha rasin dam rake pala ukosa sandina nangachim, angni rasin kg-o 50 palakode, gimikan nika, 50-na bate palja” ine ma·gipa saksa aganaha.

A·chik ma·giparangsan ong·aigija, Garo Hills-ni dingtang dolrangba, Bristibar salo SP-ni okamako man·e, DC aro SP baksa ia obostani bidingo tom·e chanchirimangaha. Apsandaken NGO-rangba, Garo Hills-ona re·bae kam ka·giparang, bajar antirango me·su-samjak aro dingtang dingtang bosturangko palgipa gipin jatrangko Garo Hills-o napna on·jachina, NGO-rang SP-ko didiangaha.

Uni gisepon gipin jatrang re·bae, maiba a·sel ong·na nangode, NGO-rang daitoko ra·jawa ineba tom·anio parakangaha, ine GSMC-ni Acting Chairman Balkarin Ch.Marak u·iataha.