Baghmara, Nov 1,2024: South Garo Hills a·jani Deputy Commissioner (DC) office ning·o nape ma·manti bosturangko palengani a·sel office-o kam ka·giparang kamtangtangko name aro ka·na man·jaenga ine A·chik Conscious Holistically Integrated Krima (ACHIK) Southern Zone parakatenba, DC office ning·o bostu palgiparangko napna on·jachina South Garo Hills a·jani Deputy Commissioner-ko didiataha.

“Angni DC office-ona re·angmiting somoio ba·ra palgipa manderangni office-o nape kam ka·giparangna ba·ra palako anga nikaha. Kamni somoio ba·ra palgiparang office-ona re·angani a·sel kam ka·giparang kamtangtangko ka·gija badinggipa mandeni ba·rarangkosa nie dongskaaha,” ine ACHIK Southern Zone-ni General Secretary Wilban N Sangma parakatenba, indake office-ni somoio bostu palbadinggipa manderangko office ning·o napna on·jachina South Garo Hills a·jani Deputy Commissioner-ko didiataha.

South Garo Hills a·jani DC office-o, mongsongbate general branch-o indake bosto palbadinggipa manderangko napna on·jachina aro pilak branch-rangkon office-ni somoio bostu palbadinggipa manderangko napna on·jachina ge·etaniko on·na ACHIK Council DC-ko didiangaha.

“Bostu palbadinggipa manderangni DC office-o napaniko champengna gita Section 163 BNSS-ko ra·gatchina, pilak branch-rangon ba·ra ba dingtang dingtang bosturangko palgipa manderangko napna on·gija ge·etaniko on·china aro office-ni somoio koros ka·ani ong·ja, indiba kam ka·ani somoisa kam ka·giparangna gisik ra·ataniko on·china anga didienga,” ine ACHIK-SZ-ni General Secretary, SGH-ni Deputy Commissioner-na sedoataha.