@ghdnews.in@

Baghmara, Jan 21, 2026: Meghalaya a·dokko man·dilangchenggipa aro a·dokni skanggipa Skotong Minister Captain Williamson A Sangma sagiko mande, ra·pilskaani chin gita Budbar salo, chang 54-gipa Meghalaya Day-ko South Garo Hills a·jani skotong Baghmara-o maniangaha.

Ia salko manianio a·dokni Skotong Minister Conrad K Sangma, mongsonggipa sokgipa ong·e bak ra·angengon, unbaksana a·dokni Deputy Skotong Minister Prestone Tynsong, Education Minister Lahkmen Rymbui, MLA-rang, MDC-rang, dingtang dingtang sorkari official-rang aro jolo songdongenggipa bang·a manderang bak ra·angtokaha.

Indake ia salko manianio a·dokni Skotong Minister, jinmana aganprakangengon, Meghalaya Day-ko Baghmara-o manianiara a·dokni pilak biaprangkon nichanggalgija sorkarini miksonge kam ka·aniko mesokani ong·a ine aganangaha.

South Garo Hills a·jako indita bilsirangna nichanggalaha, indiba da·ode South Garo Hills-o dingtanganiko ra·bana gita sorkari, rakbee kamrangko ka·engaha ineba ua aganaha.

Indake ia salara a·dokni manderangna namen gamchatbegipa sal ong·a. Captain Williamson A Sangma sagini dilanichi, a·dokni pagitchamrang, ku·cholsan ong·e, an·chi pari nikgijan a·dokko man·e on·angahani gimin, ia salko Captain Sangma sagini a·jao manianina krachongmota, ine Skotong Minister aganaha.

Batanggimin bilsi gittamni gisepo 10 percent-mang a·doko dal·roroaniko ra·bana man·aha aro ian Meghalaya a·dok, India a·songo ta·rakbatsrange dal·roroenggipa gipin a·dokrangoni damsa ong·enga ine Sangma aganaha.

Baghmara Water Supply Scheme-ni gnigipa bakna salsa skangsan gong kror 140-ko chamatmanaha. South Garo Hills a·jao rama jal·langrangko aro sanna bananirangko nambatatna gita a·dok sorkari, mongsonggipa kamrangko ka·enga ine Skotong Minister parakangaha.

Baghmara Civil Hospital-o kam ka·giparangko on·dapna, rongtal an·talaniko rakkina aro hospital-o nangdapenggipa dingtang dingtang bosturangko sokate on·na gitaba Skotong Minister ku·rachakangaha.

Meghalaya a·dokko man·na krengdilanggipa a·dokni gitcham dilgiparangna mande ra·pilskaaniko dakengon, chengonin Meghalaya a·dokni manderang ku·cholsan ong·e kam ka·giparang ong·a ine ia apsan gunkon ja·rikangkuna gitaba Skotong Minister, a·doko songdongenggipa dingtang dingtang jatrangko didiangaha.

Ia salni bako a·songni Prime Minister Narendra Modi-ba a·dokni manderangna nama skaniko on·ataha, ine jinmana parakangengon, uni seatgipa chittio Prime Minister, PA Sangma sagini kamrangko aro uni Meghalaya a·dokna on·gilanirangko janapataha ine Skotong Minister aganangaha.

Indake tom·anio a·dokni Deputy Skotong Minister Prestone Tynsong-ba jinmana aganprakengon, ia maniani namen gisik ra·beani sal ong·a, ine janapatenba, Baghmara-o ian skanggipa changna a·dokni dal·begipa program-ko ong·atani ong·enga ineba parakataha.

South Garo Hills, Meghalaya a·doko ja·manchakbatsranggipa a·jarangoni damsa ong·enga. A·dokni pilak biaprangon, mongsongbate rama jal·langrangko nambate tarina sorkari kam ka·enga ine Tynsong aganangenba, Shillong-Baghmara ramako tariani da·o 60 percent mang matchotaha ine parakataha.

Ia salko manianio a•dokni Education Minister Lahkmen Rymbui-ba jinmana aganprakangengon, ia Meghalaya Day-ara, a·dokni songrebaaniko aro mikkangchiko niksamsoani somoi ong·enga ine aganaha. Re·anggipa 2018 bilsi dipet MDA sorkari, a·dokni pilak biaprangon dingtanganiko ra·bana man·aha ine Rymbui aganangaha.

Indake ia tom·aniko a·bachengatna Shillong-ni Khmih Choir, State Anthem-ko ring·dilaha aro uni ja·mano a·dokni dingtang dingtang jatrangba ring·anirangchi aro chrok mesaanirangchi ia manianiko mikkim gnangataha.