Shillong, Oct 26, 2026: Gambegre by-election-ko re·baenggipa November 13 tariko ong·atengani gimin BJP-ni candidate Bernard N Marak-na campaign ka·na gita BJP-ni dingtang dingtang dilgiparang campaign ka·na re·baenga ine parakataha.

Re·baenggipa Gambegre by-election-na BJP-ni National Secretary Anil Antony Garo Hills-ona re·bae campaign ka·anggen aro unbaksana a·dokni dingtang dingtang dilgiparangba campaign ka·anggen ine u·iataha.

Gambegre by-election-na campaign ka·na gita donsogimin BJP-ni dilgiparangara, a·dokni Cabinet Minister AL Hek, BJP MLA Sanbor Shullai, BJP-ni State President Rikman Momin, David Kharsati, Sukhi Pariat, Anzie Sangma, Sewina Marak aro gipin dilgiparang re·bae campaign ka·angtokgen ine parakataha.

BJP candidate aro BJP-ni State Vice President, Bernard N. Marak Gambegre by-election-o susana gita Bristibar salo nomination file ka·aha aro ua by-election-o
chena gita ka·donganiko parakataha.
“Songadamrango donggipa bang·a manderangan ma·mong sorkarini on·enggipa dingtang dingtang scheme-rangko man·tokjaengani gimin, ua scheme-rangko manderangna sokatanian BJP-ni skanggipa aro dal·batgipa miksongani ong·a” ine Bernard Marak aganaha.

A·doko NPP-chi dilenggipa MDA sorkario BJP bakrimengoba Garo Hills-o BJP MLA saksaba dongjani a·sel, ma·mong sorkarini scheme-rangko a·dok sorkari ra·sekna jotton ka·engani giminsa ua ma·mong sorkarini ra·gatgipa pilak scheme-rangkon kangal cholgrirangna sokatna gita Gambegre by-election-o susaenga ineba Marak aganaha.