@ghdnews.in@

Shillong, Jan 20, 2026: Meghalaya a·doko gital ra·gatna sienggipa, Immigration & Foreigners Act-o ‘Inner Line Permit (ILP) gita dakgipa’ niamko ra·gatna sorkari miksongengon, Meghalaya a·dokna ‘ILP gita dakgipa’ niamkode nangja ine Tura-ni Congress MP Saleng A Sangma jegataha.

“ILP gita dakgipa niamni gimin aganengon, na·simang Meghalaya a·dokni manderangko togina man·jawa,” ine Sangma aganaha.
A·dokona niamgri napsrukbaenggipa manderangko champengna gita Meghalaya sorkari, nambata cholrangkosa sandina nangenga ineba ua aganaha.

Meghalaya Residents Safety & Security Act (MRSSA), 2016-ni bidingo janapatengon, ia niamko mangrakbatatna ba jakkalna gita a·dok sorkari, mamingkon dakjaenga ine Tura MP aganaha.

India a·songni Salgro Salaram jolko Bangladesh a·songni manderang ra·sekna ka·mikkenatgipa kattarangni gimin janapatengon, iandakgipa obostarangnan ua jajrengsoenga ine Sangma aganaha.

“Gipin biaprangni manderang, Meghalaya a·dokona re·bae, pilak dakgipa kamrangko ka·anan anga jajrengsoa. An·chingo gipin biaprangoni re·bagipa manderangko ma·sina aro banoni re·baenga, uarangko sandina namgipa niam aro cholrangan dongja,” ine Tura MP aganaha.

India a·songni badiaba biaprango gipin a·songrangoni napsrukbagipa manderangko rim·a changantian, ia manderang, Meghalaya aro salgro salaramni gipin biaprang gita re·napbaa inesa a·kangrongaia ine Sangma aganaha.

A·doko niamgri napsrukbae songdong a·chaenggipa manderang bang·engahani gimin ua mikkangchi chadamberangna jajrengchakenga ineba ua aganaha.

Sangma-ni parakatani gitade, niamgri napsrukbae songdongenggipa manderangko Assam a·dokode a·rikgalengaha, indiba Meghalaya a·dokode da·onan maming ja·kurangko de·kujaenga.
“An·chingode A·chik jatkon gipin jatrangni jakchi so·otna on·aniara ra·chakna man·gijani aro namen dukni katta ong·a,” ine Sangma aganaha.

Re·anggipa January 9 tariko, Rajabala-ni Wadagokgre jolo, niamgri chalaienggipa ro·ong quarry-rangko chipatna kam ka·enggipa ACHIK Organisation-ni member saksa Dilseng M Sangma-ko so·otanina suk ong·gijaniko parakatenba, maini gimin gipin biaprangoni re·bagipa manderangko a·doko bading chiwale cha·na on·enga ine Tura-ni MP sing·doataha.

Immigration & Foreigners Act-o ILP gita dakgipa niamko ra·gatna sorkarini miksongenganiko Shillong-ni MP Dr Ricky AJ Syngkon-ba jegalataha aro a·dokna ILP-kon ra·gatchina dabiangaha.

ILP-ko man·e on·na gita ku·cholsan ong·e kam ka·china gitaba Syngkon, a·dok sorkariko didiataha.