@ghdnews.in@

Tura, Jan 19, 2026: Re·anggipa January 9 tariko Dilseng M. Sangma-ko ka·saninggija so·ote galanio jak donggipa gipin sakgni manderangko pulisrang rim·dapaha. Da·o rim·ako man·gipa manderang gimik sak 8 gapaha, ine salo pulisrang u·iataha.

Pulisrangni u·iatani gitade, Bristibar walo Assam a·dokni South Salmara-o donggipa Diara minggipa biaponiko ua sakgni manderangko rim·na man·aha.

Sakgni rim·ako man·gipa manderangara bilsi 22 ong·gipa Mozahidhur Mominin aro bilsi 22 ong·gipa Mofidur Hussain ong·a, ine West Garo Hills a·jani Superintendent of Pulis (SP) Abraham T Sangma u·iataha.

Una skang rim·ako man·gipa sak 6 manderangara bilsi 47 ong·gipa Rafiqul Islam, bilsi 30 ong·gipa Anarul Islam, bilsi 40 ong·gipa Atowar Islam, bilsi 30 ong·gipa Ariful Islam, jekon January 11 tarik walo rim·aha, unbaksana bilsi 21 ong·gipa Bahadur Shiekh aro bilsi 22 ong·gipa Mozidur Hussain ong·achim.

Ia sak 8 rim·ako man·gipa manderangara re·anggipa January 9 tariko, West Garo Hills a·jani Wadagokgre aro Rongsanggre jolo niam gri ro·ong bikotgiparangko nie re·bapilmiting somoio, ACHIK Organisation-ni member-rangko chadrapanichi member saksa Dilseng M. Sangma-ko so·otanio jak donggiparang ong·achim. Ua a·sel salni gni bajimango Wadagokgre A·kingni ning·o donggipa Goalgaon aro Kotchugre songni gisepo ong·aha.

Ua a·selni bidingo ro·ong bikotgipa nokgipako sing·sandion, ua mande kate chakenga aro uko sandie rim·na gita pulisrang jotton ka·enga ine SP parakataha.

Uandake ua obostani bidingo am·sandianirangko dakengon, so·otani somoio ong·a obostarangni gimin sandiritkkitenba, dos dakgipa manderangko rim·dapana dondikgija pulisrang kam ka·enga ine SP parakataha.

Goalgaon songo ACHIK member saksako so·otanio jak donggipa manderangni kosako niam gita rakgipa sastirangko on·gen aro sianggipa mandena aro uni nokdangna kakket bichalko ra·bagen ine a·dokni Skotong Minister Conrad K Sangma-ba ku·chakangaha.