@ghdnews.in@

Tura, Jan 19, 2026: Re·anggipa January 9 tariko West Garo Hills a·jani Rajabala Pulis Station-ni ning·o donggipa Wadagokgre A·kingo ga·akgipa Goalgaon aro Kotchugre songni gisepo ma·sina man·gijagipa manderangni chadrapanio so·ota man·gipa, ACHIK Organisation-ni member saksa janggitangko gimaatani bidingo ong·gija kattarangko songsalo gipatenggipa mande saksani kosako ACHIK Organisation Dalu Regional Unit, Sonibar salo Bharatiya Nyaya Sanhita (BNS) 2023-o pangchake, West Garo Hills ajani Dalu Pulis Station-o badi (FIR) ka·doangaha.

ACHIK Organisation-ni badi ka·e sedoatgipa chittio janpatani gitade, West Garo Hills a·jani Bhaitbari songni saksa Swadip Koch minggipa me·asa, A·chik me·chikko jik kimenba, West Garo Hills a·jani Dalu, Koinabhui (Matchigre) songo dongenggipa mande, re·anggipa January 9 tariko Rajabala Gaolgaon songo ACHIK Organisation-ni member saksako ka·saninggija doke siatani bidingo, ong·gijagipa kattarangko songsalo gipatenba, ua ong·a obostani bidingo tol·e matnangenba, manderangni gisepo ong·gija chanchichipaniko ong·atenga ine parakataha.

Swadip Koch, ua obosta ong·ani bidingo ong·gijagipa kattarangko gipatan baksana sianggipa, Dilseng Sangma sagini kam, cholon bewalrangni giminba, ong·gija matnange agananirangko dakenga. Sianggipa Dilseng Sangma sagina namgija bimingko ra·baani aro dukko ga·akenggipa nokdangni manderangna gisiko sinjetaniko on·nan baksa manderangni gisepo tom·tomaniko aro ku·mong nangrimaniko rakkianio kenchakaniko ra·baenga ine janapataha.

Uni gisepo ong·gija dake gipatenggipa mande, niam gita India a·songo songdongani nangchongmotgipa lekkarang jekai, identity card ba gipin nangchongmotgipa lekkarangko on·na gita man·jaha. Uni a·doko songdongengani bidingo daitoko jako ra·e, nirokna nangani ong·enga ineba parakataha.

Uni gimin, ua mandeni kosako man·gimin sakkirango pangchake, sigimin mandeni kosako ong·gija dake matnanganina, songsalo manderangni gisepo ong·gija dake gipatanina, aro songsalo tom·tomaniko ding·chaotna jotton ka·anina Bharatiya Nyaya Sanhita 2023-ni ning·o, Section 356 BNS; Section 197 BNS; Section 352 BNS-o pangchake, Swadip Koch-ni kosako sing·sandianiko dakchina aro niam gita ja·kurangko de·china, ACHIK Organisation Dalu Regional Unit, didiataha.