Shillong, Sep 22: Meghalaya a·dokni pilak Adhoc skulrango skigiparangko Deficit System-ona ra·dochina ba Deficit Pattern-ni Scale Pay-ko on·china dabianiko a·dok sorkari knachakjaengani gimin, Sombar salo Federation of All School Teachers of Meghalaya (FASTOM), tom·tome jinma re·jomaniko Shillong-ni Malki kal·chakramoni ong·atangaha, uni ja·mano joljol indefinite ba sima ari dongija sal wal sit-in-demonstration ba asonge jingjengataniko a·bachengataha.

FASTOM-ni State Level President Moonroy G. Momin-ni u·iatani gitade, Shillong-o tom·tome jinma re·jomaniko ong·atanio Garo Hills-ni skigiparang baksa a·dok gimikoni sak 1500 mangna baten skigiparang bak ra·angtokaha.

Batanggipa 2019 bilsionin adhoc skulrango skigiparangko Deficite System-ona ra·dochina ba Deficit Pattern-ni Scale Pay-ko on·china dabie changni chang a·dok sorkarina memorandum-rangko on·aha aro gisik pilni pil ra·atpiltaianirangkoba dakahachim. Indiba da·alona kingkingba adhoc skulrango skigiparangni dabianiko a·dok sorkari chu·sokate on·chipkujaenga. Adhoc skulrango skigiparangni man·enggipa dormaha namen komiani gimin skigiparang, nokdangtangtangko chalaianio bang·a neng·nikanirangko chagrongna nangtokenga ine Momin parakataha.

Shillong-o sal wal asonge jingjengatani ja·mano re·baenggipa September 24 tarikoba apsandaken, Tura-o sima ari dongija chong·motan indefinite sit-in-demonstration ba asonge jingjengataniko dakanggen, uni gisepon a·dok sorkari maming aganchakaniko on·jagenchimode, dingtang ja·kurangko de·anggen ineba FASTOM-ni dilgipa u·iataha.

Adhoc skulrango skigiparangni dabianiko knachakjagenchimode, FASTOM jingjengataniko dontongjawa ine Momin parakataha.