@ghdnews.in@

Tura, Jan 19, 2026: Garo Hills-o gipin jatrangna chong·motan Non-Tribal-rangna niam gri bading chiwalaniko dakna cholrangko on·engani a·selan re·anggipa January 9 tariko, A·chik chadambe saksa Dilseng M Sangma so·otako man·aha ine Robibar salo, Tura-ni MDC Bernard N Marak parakatenba, Garo Hills-o, mongsongbate Tura GDC elakkani ning·o licence gri ba tol·e tarigipa licence-rangchi bading chiwalna man·jawa ine Non Tribal-rangna mikkrakataniko on·ataha.

Tura GDC elakkani ning·o bading chiwalenggipa gipin jatrangna, Garo Hills Autonomous District Council (GHADC), niam gri Trade Licence (TNT)-rangko on·engani gimin, GHADC-ni Taxation Department-ko RTI ka·anio ma·sina man·aha, ineba Marak parakataha.

“Garo Hills-ara Indian Constitution-ni on·gimin Sixth Schedule-ni ning·o niamchi chel·chakako man·gipa a·ja ong·a aro iako pilakan ja·rikna nangchongmota. Niam bidikrangko pe·e skatang dakani gimin, anga District Administration aro GHADC-ni Chief Executive Membor (CEM)-na u·iatmanaha aro niam gri ro·ong badingengani bidingoba anga, GHADC-ni CEM aro bilo ong·enggipa a·jani officer-rangna u·iatahachim, indiba uamang gisik nangjahani a·sel, Rajabala-o niam gri ro·ong quarry-ko chalaiani a·sel dosgri chadambe saksa janggiko gimaatna nangaha,” ine Tura-ni MDC parakataha.

Marak-ni parakatani gitade, West Garo Hills a·jani a·kawe jolrango niam gri chalaienggipa quarry-rang dam 52 donga, indiba ua quarry-rangko chipna gita sorkari maming ja·kurangko de·jani a·selan uamang jakgitele ro·ong quarry-rangko chalaina man·enga.

“Uni gimin Garo Hills-o pilak ong·gija dake bading chiwalanirangko dontongatna nanga,” ine Tura MDC dabiangaha.